“Hazırda respublikada hasil edilən neftin və qazın əsas hissəsi “Azəri-Çıraq-Günəşli” yataqları hesabına əldə edilir. Artıq 20- ci ildir ki, “Azəri-Çıraq-Günəşli” layihəsinin iştirakçıları “mənfəət nefti”ndən gəlir əldə edirlər”.
FED.az xəbər verir ki, bunu SOCAR-ın birinci vitse-prezidenti, akademik Xoşbəxt Yusifzadə bildirib.
Eləcə də bax: Xoşbəxt Yusifzadə: "Azərbaycanın 4 milyard ton təsdiq edilmiş - NEFT EHTİYATI VAR"
“1999-cu ilədək neftin satışından əldə edilən gəlir sərmayə qoyuluşunun ödənilməsinə sərf olunurdusa, həmin ilin dekabrından Azərbaycanın “mənfəət nefti” xarici bazarlara çıxarılır. 2019-cu il sentyabrın 1-dək dünya bazarlarında Azərbaycanın payına düşən 287 milyon tona qədər “mənfəət nefti” satılmışdır ki, bu da AÇG üzrə indiyədək hasil edilmiş bütün neftin 58 faizi qədərdir. Mənfəət neftinin həcmi ilbəil artır”, - akademik deyib..
Xoşbəxt Yusifzadə “Əsrin müqaviləsi” müqaviləsinin iqtisadi əhəmiyyətinə toxunaraq bildirib ki, neft hasilatı Azərbaycanın tarixində ən aşağı səviyyədən – 1997-ci ildəki 9 milyon tondan 2010-cu ildə 51 milyon tona çatıb. Beləliklə, neft hasilatı 5,6 dəfə artıb.
1994-cü il sentyabrın 20-də isə Bakıda dünyanın 7 ölkəsinin 11 məşhur neft şirkəti ilə Xəzər dənizinin Azərbaycan sektorundakı “Azəri”, “Çıraq” yataqlarının və “Günəşli” yatağının dərinsulu hissəsinin birgə işlənməsinə və Hasilatın Pay Bölgüsünə dair sonralar “Əsrin müqaviləsi” kimi tanınan məşhur Saziş imzalanıb. Saziş Azərbaycan Respublikası Milli Məclisinin 15 noyabr 1994-cü il tarixli qərarı ilə təsdiq olunub.
Sonradan “Azəri-Çıraq-Günəşli” yataqlarının birgə işlənməsi haqqında sazişə düzəliş edilmiş və yenidən tərtib olunmuş müqavilə 2017-ci il sentyabrın 14-də Bakıda imzalanıb. Bu kontrakt “Əsrin müqaviləsi”nin ömrünü 2050-ci ilə qədər uzadıb. Yeni müqavilədə Azərbaycan üçün sərfəli şərtlər müəyyən edilib.
Marja
