Azərbaycanda dövlət vəsaitlərinin xərclənməsinə nəzarət gücləndiriləcək, tenderlərdə şişirdilmiş qiymətlərin qarşısı alınacaq. 

FED.az xəbər verir ki, bu və digər tədbirlər Azərbaycan hökumətinin 2021-ci ildə qarşısına qoyduğu prioritetlərdə nəzərdə tutulub.

Yanvarın 25-də baş nazir Əli Əsədovun sədrliyi ilə Nazirlər Kabinetində müşavirə keçirilib, burada 2020-ci ilin yekunlarına həsr olunmuş müşavirədə prezident İlham Əliyevin verdiyi tapşırıqların icrası və qarşıda duran vəzifələr müzakirə olunub.

Baş nazir Əli Əsədov müşavirədə çıxış edərək 2020-ci ilin əsas hadisəsi kimi xalqımızın Vətən müharibəsindəki qələbəsini vurğulayıb. O ötən ilin yekunları, makroiqtisadi göstəricilər, islahatların gedişi, qeyri-neft sektorundakı vəziyyət, pandemiyanın yaratdığı problemlər və onların aradan qaldırılması haqda da danışıb.

Müşavirədə Maliyyə naziri Samir Şərifov, İqtisadiyyat naziri Mikayıl Cabbarov, ƏƏSMN Sahil Babayev, Ekologiya və Təbii Sərvətlər naziri Muxtar Babayev məruzə ediblər.

Müşavirədə müzakirə olunan əsas məsələlər işğaldan azad edilən ərazilərin inkişaf etdirilməsi və köçkünlərin torpaqlarına qayıtması, korrupsiyaya qarşı mübarizə, dövlət vəsaitlərinin xərclənməsinə nəzarətin güclənməsi, qiymətlərin artımına yol verməmək, eləcə də sahibkarlar üçün şəraiti yaxşılaşdırmaq və özəl sektorun inkişafı olub. 

Əli Əsədov qeyd edib ki, prezidentin tapşırığına uyğun olaraq işğaldan azad edilmiş ərazilər üzrə Strateji Fəaliyyət Planı hazırlanır və bütün ərazilərin və şəhərlər vahid konsepsiya əsasında bərpa ediləcək.

Müşavirədə prezident İlham Əliyevin tapşırıqları əsasında növbəti il üçün müəyyənləşdirilmiş prioritetləri səsləndirib. Bunlar aşağıdakılardır:

- İşğaldan azad edilmiş ərazilərin bərpası zamanı hər bir iqtisadi rayonun təbii-iqlim şəraiti və profili nəzərə alınmalıdır;

- Qarabağ bölgəsinin turizm marşrutlarının işlənib hazırlanmasına başlanılmalıdır;

- Nəzərdə tutulmuş beynəlxalq hava limanlarının, yeni dəmir yolu xətlərinin tikintisi bölgənin inkişafına əhəmiyyətli təkan verəcəkdir və o cümlədən məşğulluq məsələlərinə də xidmət edəcək;

- İşğaldan azad olunan ərazilərdə heyvandarlıq, bağçılıq, tərəvəzçilik, üzümçülük və taxılçılıq sahələri inkişaf etdirilməlidir;

- İşğaldan azad edilmiş ərazilərdə torpaq islahatının aparılması üçün yeni mexanizm və meyarlar işlənib hazırlanmalıdır;

- Ölkə səviyyəsində su ehtiyatları ilə bağlı problemləri həll etməklə yanaşı, işğaldan azad edilmiş torpaqların su ehtiyatlarından səmərəli istifadə məsələlərinə xüsusi diqqət yetirilməlidir. Azad edilmiş torpaqlarda ən müasir suvarma sistemləri yaradılmalıdır;

- Azad edilmiş ərazilərin yaşıl enerji zonasına çevrilməsi, həmin ərazilərdə su mənbələrindən istifadə edilərək su elektrik stansiyalarının tikintisi imkanları da nəzərdən keçirilməlidir;

- İşğaldan azad olunmuş ərazilərin bərpası məsələləri dövlət orqanlarının dövlət siyasətinin müxtəlif istiqamətləri üzrə fəaliyyətində prioritet təşkil etməli, cari və perspektiv işlər Böyük Qayıdış planları ilə əlaqələndirilməlidir;

- Keçmiş köçkün əhalimiz öz dəbə-baba yurdlarına qaytarılmalıdır. Bu proses xüsusi proqram əsasında həyata keçirilməlidir;

- Ölkədə həyata keçirilən antikorrupsiya tədbirləri ardıcıl şəkildə davam etdirilməli və bütün dövlət qurumlarını əhatə etməlidir;

- Mərkəzi icra hakimiyyəti orqanlarının Hökumətə təqdim etdiyi təkliflərin hər birində antikorrupsiya mexanizmləri və elementləri nəzərdə tutulmalı, sui-istifadə hallarına qətiyyən yol verilməməlidir;

- Cari ildə iqtisadi artımın bərpa edilməliidir;

- İnflyasiya meyllərinin qarşısı alınmalıdır;

- Valyuta ehtiyatları səmərəli idarə edilməlidir;

- Dövlət vəsaitlərindən səmərəli istifadə olunması üçün maliyyə inzibatçılığının keyfiyyəti yüksəldilməli, maliyyə intizamı gücləndirilməli, nəzarət mexanizmləri sistemi təkmilləşdirilməlidir;

- Fiskal dayanıqlığın təmin edilməsi davamlı olaraq büdcə xərclərinin optimallaşdırılmasını, qənaət rejiminin tətbiq olunmasını, artıq və səmərəsiz xərclərin qarşısının alınmasını tələb edir;

- Dövlət satınalmalarının şəffaflığı və effektivliyi təmin edilməlidir. Şişirdilmiş qiymətlərlə satınalmaların qarşısı qətiyyətlə alınmalıdır.  Tenderlərin keçirilməsinə xüsusi önəm verilməlidir.

- Özəl sektor investisiya layihələrinin maliyyələşdirilməsinə cəlb edilməlidir;

- Dövlət-özəl tərəfdaşlığının təşviqi davam etdirilməlidir;

- Prioritet sahələrə özəl investisiyaların cəlb edilməsi stimullaşdırılmalıdır;

- Dövlət investisiya layihələrinin səmərəliliyi təhlil edilməlidir;

- Antiinhisar siyasəti gücləndirilməli, haqsız rəqabətə, xüsusilə də istehlak bazarında süni qiymət artımına yol verilməməlidir;

- Kiçik və orta sahibkarlığa dəstək proqramı davam etdirilməlidir;

- İxrac imkanları genişləndirilməlidir;

- Keçən il start verilmiş lakin məlum səbəblərdən tam həcmdə tətbiq edilməmiş  İcbari Tibbi Sığorta sistemi bu il 2 mərhələdə həyata keçirilməlidir;

- Post-pandemiya dövrünə ciddi hazırlıq işləri görülməli,  orta və uzunmüddətli hədəfləri bir daha dəqiqləşdirilməlidir.