Dövlət

«Əmlakın qeydiyyatı davam edir, çalışın onlayn müraciət edin» - MÜSAHİBƏ

«Əmlakın qeydiyyatı davam edir, çalışın onlayn müraciət edin» - MÜSAHİBƏ | FED.az
16:10 7 Aprel 2020

Məlumdur ki, koronavirus təhlükəsinə görə bir çox müəssisələr fəaliyyətin dayandırıb. Amma fəaliyyətinə icazə verilmiş dövlət orqanları öz işlərini “online” qaydada davam etdirir.

FED.az Əmlak Məsələləri Dövlət Komitəsinin “online” qaydada işlərinin təşkili ilə maraqlanıb. Komitənin ictimaiyyətlə əlaqələr və informasiya şöbəsinin müdiri Qulu Xəlilov FED.az-ın suallarını cavablandırıb.

- Qulu müəllim, hazırda Komitə hansı rejimdə fəaliyyət göstərir? Əməkdaşlar işə gəlirmi, yoxsa evdən çalışırlar?

- Koronavirus pandemiyasının yayılmasının qarşısının alınması ilə bağlı bütün dünyada olduğu kimi, Azərbaycanda da zəruri addımlar atılır. Bununla bağlı Nazirlər Kabineti yanında Operativ Qərargah yaradıldı. Bu qərargahın müvafiq tapşırıqlarına uyğun olaraq, infeksiyanın geniş yayılmasının qarşısının alınması məqsədi ilə Əmlak Məsələləri Dövlət Komitəsinin işçilərinin də fəaliyyətində məhdudiyyətlər var. Tapşırıqlara uyğun olaraq Komitənin xüsusi icazə almış işçiləri fəaliyyət göstərir.

- İndi Komitə hansı xidmətləri göstərir, hansı xidmətləri aktivdir?

- Qeyd edim ki, Komitənin fəaliyyətində dayanma yoxdur. İstər daşınmaz əmlakın idarəçiliyi, istər özəlləşdirmə, istərsə də daşınmaz əmlakın qeydiyyatı olsun bütün xidmətlər aktivdir.

- Əmlakın qeydiyyatı ilə bağlı vəziyyət nə yerdədir? Qeydiyyat aparılırmı?

- Digər xidmətlərlə yanaşı, vətəndaşlarımızın ən çox müraciət etdiyi xidmətlər daşınmaz əmlakın qeydiyyatı ilə bağlıdır. Burada da infeksiyanın qarşısının alınması məqsədi ilə zəruri tədbirlər həyata keçirilir. Məlumdur ki, vətəndaşlar ən çox daşınmaz əmlakın qeydiyyatı ilə bağlı müraciət edir. Burada birbaşa ünsiyyətin azaldılması məqsədi ilə vətəndaşlara müraciət olunub ki, onlar daşınmaz əmlakın qeydiyyatı ilə bağlı xüsusi hal yarandığı təqdirdə müraciət etsinlər. Həm əmlakın qeydiyyatı ilə bağlı regional ofislərə, həm də Əmlak Xidmətləri Məkanına.

- Ümumiyyətlə, hazırda əmlakın qeydiyyatı ilə bağlı müraciətlər varmı? Çünki hamı karantindədir.

- Vətəndaşlara tövsiyə etmişik ki, 193 “Qaynar xətt” və 1186 nömrəli çağrı mərkəzlərinə müraciət edərək öz müraciətlərinin təxirəsalınmazlığını əsaslandırsınlar. Biz də əsaslandırılmış müraciətlərə uyğun olaraq, dərhal qeydiyyat məsələlərini həyata keçiririk. Ümumiyyətlə, daşınmaz əmlakın qeydiyyatı əgər təkrar bazardan daxil olursa, bu, sırf “online” həyata keçirilir. Yəni birbaşa ünsiyyət olmur.

- Ölkədə tətbiq edilən karantin tədbirləri digər qurumların da işini məhdudlaşdırıb (məsələn, notariusların), bu mənada qeydiyyat üçün müraciətlərin sayı azalıbmı?

- Notariusdan “online” qaydada sənədlər reyestr ofislərinə və əmlak xidmətləri məkanına daxil olur. Bu sənədlər gecikdirilmədən dərhal icra olunur və vətəndaşlarımıza elektron çıxarışlar hazırlanıb təqdim olunur. Təbii ki, bu elektron çıxarışlar da vətəndaşlara elektron qaydada təqdim olunur. Yəni onların elektron hökumət portalındakı xüsusi kabinetinə yerləşdirilir və yaxud da onların e-malinə göndərilir. Burada da birbaşa ünsiyyət sıfır enir.

- Əmlakın internetlə qeydiyyatı mümkündürmü? Yəni evdən çıxmadan sənədləri göndərməklə, bunun üçün nə tələb olunur?

- Əgər digər hallar mövcuddursa, yəni ilkin qeydiyyat və yaxud digər texniki sənədlərin alınması ilə bağlı məsələlər varsa, onda vətəndaşlarımıza tövsiyə olunur ki, elektron xidmət vasitəsi ilə müraciət etsinlər. Bunun üçün vətəndaşlar e-mdka.gov.az saytındakı elektron xidmətlər portalı vasitəsilə müraciət edə bilərlər. Biz bütün əməkdaşlarımızın xidməti e-mail adreslərini və əlaqə nömrələrini elan şəklində həm saytımızda, həm də sosial şəbəkədə yerləşdirmişik. Qeydiyyat xidmətindən yararlanmaq istəyən vətəndaş, bu poçt ünvanlarına öz sənədlərini göndərə bilərlər. Biz bunun qanunvericiliyə uyğunluğunu yoxlayıb icrasına başlayırıq. Daha sonra zərurət yarandıqda vətəndaşlar sənədlərin əslini Komitəyə təqdim edə bilirlər.

- Ümumiyyətlə, Komitənin neçə onlayn xidməti var? Onların hamısı aktivdirmi?

- Komitənin Əmlak İdarəsi ilə bağlı 41 elektron xidməti mövcuddur. Burada həm daşınmaz əmlakın qeydiyyatı ilə bağlı xidmət haqları, həm kadastırla bağlı xidmət haqlarının öyrənilməsi, təkrar qeydiyyatla bağlı müraciətlərin edilməsi, eyni zamanda sənədlərin icra vəziyyəti ilə bağlı məlumatın öyrənilməsi kimi xidmətlərdən elektron qaydada yararlanmaq mümkündür.

- Hazırda karantin vəziyyətində onlayn xidmətlərdən istifadə artıbmı?

- Ümumiyyətlə, Komitədə həmişə olduğu kimi, qeydiyyatla bağlı müraciətlər üstünlük təşkil edir. Bununla bağlı həm “Qaynar xətt”lərə, həm də elektron qaydada müraciətlər olunur. Təbii ki, azalmalar da müşahidə olunur. Çünki xüsusi karantin rejimidir vətəndaşlarımıza tövsiyə etmişik ki, xüsusi hallar yarandıqda qeydiyyat xidmətləri üzrə müraciət etsinlər.

- Ən çox hansı xidmətlərdə artım var?

- Burada daşınmaz əmlakın qeydiyyatı və təkrar qeydiyyatla bağlı xidmətlərin adın çəkmək olar.

- Bəs Komitənin Əmlak Xidmətləri Məkanı necə rejimdə işləyir? Orada vətəndaşlar qəbul edilirmi, edilirsə hansı formada?

- Ümumiyyətlə, Əmlak Xidmətləri Məkanı və qeydiyyatla məşğul olan regional ofislər öz fəaliyyətlərini davam etdirirlər. Sadəcə biz vətəndaşlara tövsiyə edirik ki, bizim elektron xidmətlərdən istifadəyə daha çox üstünlük versinlər. Eyni zamanda “Qaynar xətt” çağrı mərkəzləri vasitəsilə öz müraciətlərini etsinlər. Digər tərəfdən, xüsusi hallarda Komitənin mobil qeydiyyat xidmətləri də bilavasitə vətəndaşlara ünvanlarda da xidmət göstərir. Bu, 65 yaşdan yuxarı vətəndaşlara aiddir, hansı ki onlar xüsusi risk qrupuna daxildirlər. Onlar “Qaynar xətt”ə müraciət edərək öz ünvanlarında qeydiyyat xidmətlərindən yararlana bilərlər. Yəni insanlara evlərini tərk etməmək şərti ilə ünvanlarda qeydiyyat xidməti göstərilir. Bu halda da Komitənin əməkdaşları xüsusi karantin rejiminin qaydalarına tam riayət edir və tibbi ləvazimatlarla təchiz olunurlar.

Digər xəbərlər