Paytaxt Bakı şəhərində uzun illərdir ki, çox sayda zeytun ağacları əkilib və bu həmişəyaşıl ağaclar şəhərimizə xüsusi gözəllik verir. Lakin bir müddətdir ki, şəhərin müxtəlif ərazilərindəki zeytun ağaclarında naməlum xəstəlik aşkarlanıb, bu da bəzi ağaclarda quruma və saralmalara gətirir.
FED.az xəbər verir ki, Bakı Şəhər İcra Hakimiyyətinin (BŞİH) mətbuat xidmətindən bildirilib ki, dövlət qurumlarını, ictimaiyyəti və paytaxt sakinlərini narahat edən bu məsələ ilə əlaqədar BŞİH tərəfindən müvafiq qabaqlayıcı tədbirlər həyata keçirilir, qurumun tapşırığına uyğun olaraq şəhərin bütün ərazisində zeytun ağaclarının vəziyyətinin araşdrılması aparılır.
Xüsusi olaraq İsraildən dəvət edilən bitkiçilik üzrə mütəxəssis, aqronom Qabriel Eliazz hazırda Bakıdadır və yerli mütəxəssislərlə birlikdə paytaxtın müxtəlif ərazilərində mövcud zeytun ağaclarının vəziyyəti araşdırılır, xəstə ağacların müalicəsi ilə bağlı tədbirlərə başlanılıb.
Qabriel Eliazzisin bildirdiyinə görə əsas etibarilə qlobal iqlim dəyişiklikləri səbəbindən baş verən bu hal demək olar ki, bütün dünyanı bürüyüb. Dünyanın aparıcı zeytun istehsalçılarından olan İtaliya, İspaniya, Yunanıstan, qardaş Türkiyədə xeyli zeytun ağacı xəstəlik səbəbindən məhv olub. O bildirib ki, Bakı meriyası tərəfindən görülən qabaqlayıcı işlər bu xəstəliyin geniş yayılmasının qarşısını alıb. Zeytun ağaclarında müşahidə edilən xəstəliklərin aradan qaldırılması məqsədilə müxtəlif müalicə üsulları tətbiq olunur, ağaclara gübrə verilir, onlar xüsusi kimyəvi tərkibli dərmanlar olan ampulalarla inyeksiya edilir və quruyan budaqları budanır. Yoluxan ağacların budaqlarının və quruyan yarpaqların budanması digər ağaclara yayılmasının qarşısının alınması məqsədilə edilir.
Həmçinin bildirilib ki, əvvəlki vaxtlarda cavanlaşdırma məqsədilə budanan ağaclara xəstəlik demək olar, təsir etməyib və mövsüm zamanı zeytun ağaclarında cavanlaşdırıcı budama işlərinin aparılması vacib şərtlərdəndir.
