Balakən rayonu, Katex kəndinin sakini Şəmsi Şabanova maldarlıq təsərrüfatına rəhbərlik edən “ABAD”çı qadın sahibkarlardandır. O, 5 ildən artıqdır ki, rayonun Sarıbulaq, Qazbinə kəndlərində ətlik məqsədilə 400-dən artıq iribuynuzlu heyvan yetişdirir.
Şəmsi Şabanovanın sözlərinə görə, o, atasından sonra maldarlıq təsərrüfatına rəhbərliyə başlayıb.
“Əvvəllər yalnız ət satışı ilə məşğul olurduq. Lakin satış bazarımızı genişləndirmək və daha çox gəlir əldə etmək üçün dəstəyə ehtiyacımız var idi. Bu məqsədlə Balakən regional “ABAD” mərkəzinə müraciət etdim və kolbasa məhsullarının istehsalı üçün avadanlıqla bağlı dəstək istədim. Müraciətim müsbət cavablandırıldı. Ailəmizə ət məhsullarının emalı üçün monoblok-konteyner şəklində zəruri avadanlıqlar təqdim olunub”, - deyə, sahibkar qeyd edir.
“ABAD” tərəfindən ailə üçün “Bizim nemət” kolbasa brendi yaradılıb. “ABAD”ın dəstəyi ilə “bir pəncərə” prinsipi üzrə sertifikatlaşdırılmış “Bizim nemət” kolbasa məhsulları yüksək keyfiyyəti ilə fərqlənir.
Şəmsi xanımın sözlərinə görə, məhsulların hazırlanmasında yalnız təbii məmulatlardan istifadə olunur:
“Biz kolbasa məhsullarının istehsalı üçün təsərrüfatımızda yetişdirdiyimiz iribuynuzlu mal-qaranın ətindən istifadə edirik. İnanıram ki, “Bizim nemət” brendi ailəmizə məxsus olsa da, dadı və keyfiyyətinə görə hər bir alıcı üçün doğma ada çevriləcək”.
"YÜKSƏK KEYFİYYƏTLİ KOLBASA HAZIRLAMAQ FİKİRİNDƏYƏM"
Kolbasa istehsalına fokuslanan digər “ABAD”çılardan biri Masallı rayon Təzə Alvadı kənd sakini Göyçək Ələsgərovadır.
O, “ABAD”a müraciət edərək, ət məhsulları istehsal etmək niyyətində olduğunu bildirib. “ABAD”ın beynəlxalq qurumlarla əməkdaşlığı çərçivəsində, BMT-nin İnkişaf Proqramının (UNDP) dəstəyi ilə qadın sahibkara ət məhsullarının istehsalı üçün bütün zəruri avadanlıqlarla təchiz olunmuş monoblok-konteyner təqdim olunub.
G.Ələsgərovanın sözlərinə görə ailəsi uzun illər maldarlıqla məşğul olub və onun bu işə uşaqlıqdan maraq göstərməyi heç də təəccüblü deyil:
“Rayonumuzda “Heydər Əliyev” mərkəzində “Qadın Resurs Mərkəzi” yaranan zaman oranın üzvü, daha sonra təşkilatçısı oldum. Maldarlıqla bağlı layihə təqdim etdim, qaliblərdən biri seçildim. Buna çox sevinirəm”.
Xanım sahibkar deyir ki, qalib olandan dərhal sonra o, “ABAD”ın ət və süd məhsulları üzrə layihələr həyata keçirəcəyini öyrənib:
“Düzdür, bu günədək böyük həcmdə kolbasa istehsalı ilə məşğul olmamışam, lakin “ABAD”ın dəstəyi sayəsində çətinliklərin öhdəsindən gəlməyi düşünürəm. Mənə verilən konteynerdə yüksək keyfiyyətli məhsul hazırlamaq fikrindəyəm.
Düşünürəm ki, əhalimizin hazırladığımız kolbasalara etimadı çox yüksək olacaq, çünki mən bazara ailəm üçün hazırladığım məhsulu təklif edəyəcəm. Mənim alıcılarım mənim ən qiymətli qonaqlarımdır. Onların qabağına qatqılı, mənşəyi bilinməyən bir məhsul əsla qoymaram”.
S.Ələsgərova gələcək planlarından ruhyüksəkliyi ilə danışır:
“Ambisiyalarım çox yüksəkdir. “ABAD”ın köməyi ilə gələcəkdə böyük bir kombinat tikib yaratmaq və qadınlar arasında məşğulluğun artırılmasına dəstək olmaq istəyirəm”.
