“Gələn ilin yanvarın 1-nə qədər qida sahəsində çalışan sahibkarlara qarşı qida təhlükəsizliyi qeydiyyatından keçmədiklərinə görə qanunvericiliyin tələbləri çərçivəsində tədbirlər həyata keçiriləcək”.
FED.az xəbər verir ki, bunu Qida Təhlükəsizliyi Agentliyinin Qeydiyyat və Sahibkarla İş şöbəsinin rəhbəri Orxan Mikayıl deyib.
O bildirib ki, Agentlik tərəfindən 1 iyul 2018-ci il tarixindən etibarən qida zəncirinin bütün mərhələlərində iştirak edən sahibkarlıq subyektlərinin qeydiyyatı və dövlət reyestrinin aparılmasına başlanılıb.
“Prosedur kifayət qədər asan olsa da indiyədək qida sahəsində fəaliyyət göstərən əksər sahibkarlıq subyektləri qeydiyyatdan keçmək üçün müraciət etməyiblər.
Eləcə də bax: Müraciət edən şəxslərə kredit ayrılmamasının - SƏBƏBLƏRİ AÇIQLANDI
“Yeyinti məhsulları haqqında” qanunun 7-ci maddəsinə Azərbaycan Respublikasında qida məhsulları sahəsində çalışan subyektlərin fəaliyyəti qida təhlükəsizliyi üzrə mövcud texniki normativ hüquqi aktların tələblərinə, sanitar-gigiyena, baytarlıq və fitosanitar tələblərə uyğunluğunun təmin edilməsi məqsədi ilə yoxlanılır.
Yeyinti məhsulları ekspertizadan keçirilir və həmin subyektlər qida təhlükəsizliyi üzrə qeydiyyata alınır”.
Orxan Mikayıl bildirib ki, qida təhlükəsizliyi üzrə qeydiyyata alınmış subyektlər dövlət reyestrinə daxil edilir və həmin subyektlərə reyestrdən çıxarış verilir.
“Qanunun 7.3-cü maddəsinə əsasən qida təhlükəsizliyi üzrə qeydiyyata alınmamış təsərrüfat subyektlərinin fəaliyyəti qadağandır. Odur ki, Azərbaycan Qida Təhlükəsizliyi Agentliyi qida zəncirinin bütün mərhələlərində iştirak edən sahibkarlıq subyektlərinə çağırış edir ki, öz fəaliyyətlərini qanunvericiliyin tələblərinə uyğun şəkildə həyata keçirsinlər.
Və qida təhlükəsizliyi qeydiyyatından keçmək üçün Agentliyə müraciət etsinlər. Əks halda, qanunsuz fəaliyyət göstərən sahibkarlıq subyektləri ilə bağlı, qanunvericiliyin tələbləri çərçivəsində tədbirlər həyata keçiriləcək”.
