25 fevral 2025-ci il tarixində Biznes Mühiti və Beynəlxalq Reytinqlər üzrə Komissiya və KOBİA-nın birgə rəhbərlik etdiyi “Korporativ idarəetmə, investisiyalar və korporativ sosial məsuliyyət” işçi qrupunun iclası keçirilib.

FED.az xəbər verir ki, iclasda Azərbaycan Respublikası Prezidentinin Administrasiyasının İqtisadi siyasət və sənaye məsələləri şöbəsinin sektor müdiri, və Biznes Mühiti və Beynəlxalq Reytinqlər Komissiyanın Katibliyinin rəhbəri Vüsal Şıxəliyev və KOBİA İdarə Heyətinin sədri Orxan Məmmədov 2024-cü il ərzində ESG altqrupunun fəaliyyətini və həyata keçirilmiş tədbirləri müsbət dəyərləndiriblər. Bildirilib ki, ötən il ərzində ESG ilə bağlı təlimlərin təşkil olunması və qanunvericilik bazasının təkmilləşdirilməsi kimi bir sıra vacib istiqamətlərdə işlər aparılıb.

Tədbir zamanı, ESG dəyərlərinin təbliğində səmərəli fəaliyyətlərinə görə EKVİTA şirkətinə təşəkkürnamə təqdim edilib. Azərbaycanda ESG prinsiplərinin tətbiqi sahəsində lider olan EKVİTA şirkəti doqquz beynəlxalq İSO standartı üzrə sertifikatlaşmış, habelə AZS IWA 48:2024 - Ətraf mühit, sosial və korporativ idarəetmə (ESG) prinsiplərinin tətbiqi üzrə çərçivə sənədinin tələblərini tətbiq edən ilk şirkət oldu.

EKVİTA şirkətinin təsisçisi və direktoru İlqar Mehti qeyd edib ki, “Bu nailiyyət EKVITA-nın dayanıqlı inkişaf, şəffaf idarəetmə və yüksək beynəlxalq standartlara uyğun fəaliyyət prinsipinə sadiqliyini bir daha təsdiqləyir.”

Sözügedən İSO standartları aşağıdakılardır:

1. ISO 9001:2020 – Keyfiyyətin İdarə edilməsi sistemləri
2. ISO 14001:2021 - Ətraf mühitin idarə edilməsi sistemləri
3. ISO 45001:2021 - Peşə sağlamlığı və təhlükəsizliyinin idarəetmə sistemləri
4. ISO 26000:2022 - Sosial məsuliyyət üzrə rəhbərlik
5. ISO 37001:2021 - Rüşvətxorluğa qarşı idarəetmə sistemləri
6. ISO 31000:2022 - Risklərin idarə edilməsi
7. ISO 22301:2023 - Təhlükəsizlik və davamlılıq. İş fəaliyyətinin (biznesin) davamlılığının idarəetmə sistemləri
8. ISO 37000:2024 - Korporativ idarəetmə. Rəhbəredici göstərişlər
9. ISO 50001:2022 - Enerji menecment sistemləri

“Biz ölkəmizin inkişaf strategiyasına, dövlətimizin müxtəlif çağırışlarına heç vaxt biganə qalmırıq.  EKVİTA daha əvvəl də müxtəlif qabaqcıl təcrübələri ölkəmizdə ilk dəfə istifadə edən şirkət olub. Hələ 2017-ci ildə İSO 37001 - Rüşvətxorluğa qarşı idarəetmə sistemlərini nəinki Azərbaycanda, bütün MDB məkanında ilk tətbiq edən şirkət olduq”, deyə İlqar Mehti vurğulayıb.