Bu gün ölkənin istehlak bazarında hiss olunmayan tempdə bahalaşma gedir. Mal-məhsulun qiyməti hər gün 3-5 qəpik artıdqca, o qədər də nəzərimizə çarpmır. Amma bu ay alınan ərzaq və məhsulların qiymətlərini ötənaykı qiymətlərlə müqayisə edəndə bahalaşmanı hiss etməyə başlayırsan...
Sosial şəbəkələrdə daha çox qarpızın bahalaşmasından şikayətlər edilsə də, elə digər mövsümi məhsullar da qarpızdan geri qalmır.
FED.az-ın məlumatına görə, Milli Məclisin İqtisadi siyasət, sənaye və sahibkarlıq komitəsinin üzvü Əli Məsimli açıqlamasında Dövlət Statistika Komitəsinin rəsmi məlumatlarına istinadən bildirib ki, əvvəlki illərlə müqayisədə bu il inflyasiya səngiyib:
“Qiymət artımına haqq qazandırılası amil yoxdur”
“Rəsmi məlumata görə, əgər 2017-ci ilin birinci yarısında qiymətlər 2016-cı ilin birinci yarısı ilə müqayisdə 14 faiz artmışdısa, 2018-ci ilin yanvar-iyun aylarında 2017-сi ilin yanvar-iyun aylarına nisbətən 3 faiz artıb, o cümlədən ərzaq məhsullarının qiymətləri 3 faiz, qeyri-ərzaq mallarının qiymətləri 3,8 faiz, əhaliyə göstərilən ödənişli xidmətlərin qiymətləri 2,4 faiz bahalaşıb.
2016-cı ildə ölkədə qiymətlərin sürətlə artmasında manatın dollara nisbətdə məzənnəsinin aşağı düşməsini əsas gətirirdilərsə, 2017-ci ildə manat sabit qaldığından, dünya bazarında qiymətlərin artmasını əsas gətirməyə başladılar. Əslində bunların hər ikisi yarımçıq həqiqətlərdir. Bu il isə qiymət atrımına haqq qazandırılası amil yoxdur. Çünki əslində ölkədə nəzərəçarpan qiymət artımının iqtisadi əsası yoxdur. Maaşlar cüzi artırılıb və bu inflyasiya təzyiqi ola bilməz. Əhalinin çox hissəsinin banklara borcu var və banklar borcu olanların maaşlarının ən azı yarısını həmin borca görə tutur”.
“Rəsmi statistika reallığı əks etdirmir”
Ə.Məsimli mövsümü olmasına baxmayaraq, bəzi məhsulların bahalaşmasına da münasibət bildirib:
“İndi yay fəslidir. Ona görə də əslində mövsümi məhsulların qiymətlərinin nəzərəçarpan dərəcədə aşağı düşən vaxtdı, necə deyərlər, sezondu. Üstəlik də banklar məzuniyyətə çıxan borcluların məzuniyyət haqqının əksər hissəsini tuturlar. Vətəndaşa demək olar ki, heç nə qalmır. Belə şəraitdə tədiyyə (ödəniş) qabiliyyətli tələb aşağı düşdüyündən qiymətlər də aşağı düşməlidir. Amma Bakının istehlak bazarında aparılan müşahidələr göstərir ki, rəsmi statistika məlumatları xeyli məhsul üzrə qiymətlərin dinamikasını real əks etdirmir. Hazırda mövsümü xarakterli məhsulların, meyvə-tərəvəzin qiymətləri enmək əvəzinə çoxunun qiymətində nəzərəçarpan dərəcədə artım var. Xüsusən də rəsmi statistikanın dediyi kimi gilasın, əriyin, çiyələyin, pomidorun, göy lobyanın və sairin qiymətlərində enmə yox, artım var. Qarpızın qiyməti isə rekord vurur. Orta ölçülü bir qarpız orta ölçülü bir toyuqdan baha satılır”.
“Maaşların artan hissəsinin 2-3 qatı monopolistlərin cibinə gedir”
Parlamentari bildirib ki, bahalaşma nəticəsində əhali maaş artımından əldə etdiyinin 2-3 qatını itirir:
“Büdcə təşkilatlarında çalışanların maaşlarının 10 faiz artırılması ilə onların əksəriyyətinin orta aylıq əmək haqqına 20-30-40 manat əlavə oldu. Bu, çox azdır. Digər tərəfdən, maaş artımının arxasınca başlayan bahalaşma nəticəsində insanlar əmək haqlarının artımından əldə etdikləri 20-30 manatdan 2-3 dəfə çox itirirlər. Nəticədə maaş artımından əhali yox, qiymətləri artıranlar bəhrələnirlər. 2018-ci ilin büdcəsinə yenidən baxılanda biz təklif etmişdik ki, bu il- Azərbaycan Xalq Cümhuriyyətinin 100 illik yubileyidir. AXC-nin belə yuvarlaq yubiley ili bir də 100 ildən sonra olacaq. Ona görə də bu yubiley münasibətilə maaş və pensiyalar bir də artırılsın. Eyni zamanda, süni qiymət artımının da qarşısı alınsın ki, artan maaş, pensiya müavinət və sair monopolistlərin və onların ətrafındakıların cibinə yönəlməsin. Əhalini rifahına, əslində rifah sözü böyük çıxır, heç olmasa əvvəlkindən bir kiloqram artıq ət, yağ və sair məhsul almağa yetərli olsun”.
