2025-ci ilin ilk 5 ayında Azərbaycanın ümumi mal idxalı ötən ilin eyni dövrü ilə müqayisədə kəskin artaraq 7,3 milyard dollardan 9,96 milyard dollara çatıb. Beləliklə, ümumi idxalda 2,66 milyard dollar və ya 36,5% artım qeydə alınıb.

• Azərbaycanın xarici ticarət rəqəmləri açıqlandı - İdxal artıb, ixrac azalıb

FED.az Dövlət Gömrük Komitəsinin məlumatlarına istinadən xəbər verir ki, idxalın artımında bir sıra strateji və istehlak məhsulları həlledici rol oynayıb.

İdxal Həcmi Artan Məhsullar: Buğda və Süd Məhsulları Liderdir

Hesabat dövründə miqdar baxımından ən böyük artım ərzaq təhlükəsizliyi üçün strateji məhsul sayılan buğdanın idxalında baş verib. Bu ilin ilk 5 ayında buğda idxalı 182 min ton və ya 55,3% artaraq,  328 min tondan 510 min tona yüksəlib.

Bu dövrdə süd-qaymaq idxalı miqdar baxımından 25,4% artaraq 7 min tona yüksəlib. Çay idxalı isə təqribən 23% artaraq 6,3 min tona qalxıb.

İdxalı miqdar baxımından artan məhsullar arasında kərə yağı (artım 10%), meyvə-tərəvəz (artım təqribən 8%) və plasmasssı (artım 7,4%) qeyd etmək olar.

İlk 5 ayda xaricdən 11,5 min ton kərə yağı, 228 min ton meyvə-tərəvəz və 128,7 min ton plasmassa idxal edilib.

Daha ətraflı cədvəldə:

Xaricdə daha çox pul çıxaran məhsullar: Buğda, yağ və avtomobillər

Hesabat dövründə ərzaq təhlükəsizliyi üçün mühüm olan məhsulların məbəğ ifdəsinə idxalında ciddi artım müşahidə olunub. Xüsusilə, buğda idxalına çəkilən xərclər 37,8 milyon dollar və ya 52% artaraq 110,4 milyon dollara yüksəlib.

Kərə yağı və digər süddən hazırlanmış yağların idxalı 26,3 milyon dollar və ya 48,6% artaraq 80,5 milyon dollara, çay idxalı isə 48,3% artaraq 38,1 milyon dollara çatıb.   

Ümumilikdə yeyinti məhsulları idxalı 11,6% artaraq 1 milyard 64 milyon dollar təşkil edib.

Ölkəyə avtomobil və onların hissələrinin idxalı da artımaqdadır. Bu sahəyə xərclənən vəsait 12,9% artaraq 864 milyon dollardan 975 milyon dollara çatıb.

Həmçinin, əhalinin istehlak xərclərini əks etdirən geyim əşyaları və ləvazimatlarının idxalı 18,9% ( 182 milyon dollara çatıb), mebel idxalı isə 10% artıb. Sənaye məhsullarından plastmassa idxalı 11%, gübrə idxalı isə 14,6% artıb.

Daha ətraflı cədvəldə: