Bu ilin yanvar-iyun aylarında Azərbaycanın hava nəqliyyatında sərnişin daşımalarında artım qeydə alınsa da, yük daşımaları və bu sahədən əldə olunan gəlirlərdə ciddi azalma müşahidə edilib.
FED.az bu barədə Dövlət Statistika Komitəsinə istinadən xəbər verir.
Hesabat dövründə hava nəqliyyatı ilə daşınan sərnişinlərin sayı 46,8 min nəfər (2,6%) artaraq 1 milyon 861,1 min nəfərə çatıb. Bu artım tamamilə beynəlxalq reyslərin hesabına baş verib: xaricə uçan sərnişinlərin sayı 55 min nəfər (3,8%) artaraq 1 milyon 518,9 min nəfər olub. Əksinə, daxili reyslərdə sərnişin sayı 8,2 min nəfər (2,3%) azalaraq 342,2 min nəfərə enib.
Yük daşımalarında isə həm beynəlxalq, həm də daxili istiqamətlərdə azalma qeydə alınıb. Daşınan yüklərin ümumi həcmi 22,1 min ton (10,5%) azalaraq 187,6 min ton olub. Azalmanın əsas hissəsi 21,5 min ton itirən beynəlxalq daşımaların payına düşür.
Bu tendensiyalar gəlirlərdə də ziddiyyətli mənzərə yaradıb. Sərnişin sayının artmasına baxmayaraq, sərnişin daşımalarından əldə olunan ümumi gəlir 30,3 milyon manat (3,4%) azalaraq 869,4 milyon manat olub. Səbəb beynəlxalq reyslərdən gələn gəlirin 40,1 milyon manat azalmasıdır. Bunun əksinə, daxili reyslərdən əldə olunan gəlir 9,8 milyon manat (34,5%) artıb. Yük daşımalarından əldə olunan gəlir isə hər iki istiqamətdə azalaraq ümumilikdə 179,3 milyon manat (13,9%) geriləyib.
Ən kəskin dəyişiklik isə poçt daşınmasında qeydə alınıb. Bu sahədə daşımalar 342,3 ton və ya 131,1% artaraq 603,3 tona çatıb.
