Beynəlxalq birjalarda avronun qiyməti dollar və funt sterlinq qarşısında bahalaşmağa davam edir.
Belə ki, EUR/USD valyuta cütlüyü 1.08050 səviyyəsinə qədər ucuzlaşdıqdan sonra 1.08740 səviyyəsinə qədər bahalaşıb. Hazırda məzənnə 1.08470 həddində ticarət olunur.
EUR/GBP cütlüyü isə bugün səhər saatlarında 0.84240 həddini test edib. Son dəfə avronun funt qarşısında məzənnəsi qeyd olunan həddə 2025-ci ilin 24 yanvar tarixində ticarət olunub.
Bugün Yaponiyada dərc olunan statistik məlumatlar fonunda USD/JPY valyuta cütlüyündə yuxarı volatillik müşahidə olunur. Cütlük 146.540 səviyyəsinə qədər ucuzlaşdıqdan sonra 147.220 səviyyəsinə qədər bahalaşıb. Verilən məlumatlara əsasən, ölkə ÜDM-i dördüncü rübdə 0.6% böyüyüb. Lakin, analitiklər göstəricinin 0.7% səviyyəsində açıqlanacağını proqnozlaşdırmışdılar. Həmçinin, Yaponiyada Şəxsi Ev Təsərrüfatları Xərclərinin İndeksi illik ifadədə 4.5% geriləyib.
“Brent” markalı neftin qiyməti ucuzlaşıb. “Qara qızıl” ötən həftə 71.70$-a qədər bahalaşaraq əldə etdiyi mövqelərini artıq cari həftənin əvvəlində itirib. Belə ki “Brent” bugün 68.80$ səviyyəsini test edib, hazırda isə 69.50$-a dünya bazarlarında təklif olunur.
“Bitcoin”-ın dəyəri həftəyə enişlə başlayıb. Kapitallaşmasına görə dünyanın ən böyük kriptovalyutası 76540$-a qədər ucuzlaşıb. Hazırda koin 80000$ civarında ticarət olunur.
Bugün ABŞ-da Bakı vaxtı ilə saat 18:00-da dərc olunacaq "JOLTS" Boş İş Yerləri və Vakansiyalar Hesabatı investorların diqqət mərkəzində olacaq. Göstəricinin 7.600 milyondan 7.650 milyona qədər artacağı ehtimal olunur.
Eləcə də, Türkiyədə açıqlanacaq Pərakəndə Satış Dövriyyəsinin Həcmi və Avroqrupun toplantısı bazar iştirakçılarının marağına səbəb ola bilər.
Məlumat İnvestAZ İnvestisiya Şirkətinin analitikləri tərəfindən hazırlanıb.
