Dünən ABŞ-da dərc olunmuş statistik məlumatlar fonunda avro və funt sterlinq çərşənbə günü dollar qarşısında başlayan artım tendensiyasını davam etdirib.

Belə ki, EUR/USD valyuta cütlüyü ötən gün ərzində 1.04180 səviyyəsindən 1.05050 səviyyəsinə qədər bahalaşıb. Bugün isə məzənnə bir qədər geriləyərək 1.04900 səviyyəsində ticarət olunur. GBP/USD cütlüyü isə eyni dövr ərzində 1.25770 həddindən 1.26730 həddinə qədər artım göstərib. 

Bugün səhər saatlarında Yaponiyada Ümummilli İstehlak Qiymətlərinin Baza İndeksi açıqlanıb. Göstərici 3.1%-lik proqnozların üzərində, 3.2% səviyyəsində dərc olundu. Həmçinin, ölkənin Xidmət Sektorunda Biznes Aktivliyi İndeksi 53.1 bənd səviyyəsində açıqlanıb. Qeyd olunan xəbərlərin dərc olunması fonunda USDJPY valyuta cütlüyü 149.260 səviyyəsindən 150.730 səviyyəsinə qədər kəskin bahalaşıb.

Ötən gün Filadelfiya FED tərəfindən dərc olunan ABŞ-ın Sənaye Sektorunda Biznes Aktivliyi İndeksi (PMI) dekabr ayında 18.1 bəndədək zəifləyib. Qeyd etmək lazımdır ki, əvvəlki ay PMI 44.3 bənd səviyyəsində açıqlanmışdır. Filadelfiya FED-dən Məşğulluq İndeksi isə 11.9 bənd səviyyəsindən 5.3 bənd səviyyəsinə qədər azalıb. Həmçinin, 2025-ci ilin yanvar ayında Almaniyada istehsal qiymətləri illik ifadədə 0.5% artıb. Aylıq ifadədə isə İstehsal Qiymətləri İndeksi (PPI) 0.1% azalıb. Göstərici dekabr ayındakı nəticəni təkrarlayıb və proqnoz olunan 0.6%-lik artıma çata bilməyib. 

Bugün ABŞ-da, Almaniyada, Avrozonada və Böyük Britaniyada açıqlanacaq Xidmət və Sənaye Sektorlarında Biznes Aktivliyi İndeksi göstəriciləri investorların diqqət mərkəzində olacaq əsas xəbərlərdir. Eləcə də, Böyük Britaniyada açıqlanacaq Pərakəndə Satış Dövriyyəsi və ABŞ-da dərc olunacaq Təkrar Mənzil Bazarında Satışların Həcmi bazar iştirakçılarının marağına səbəb ola bilər.

Məlumat İnvest-AZ İnvestisiya Şirkətinin analitikləri tərəfindən hazırlanıb.