Azərbaycan Mərkəzi Bankının (AMB) notlarının alış və satışına hüquqi şəxslərin də çıxışının təmin edilməsi şirkətlərin vəsaitlərini daha düzgün saxlamasına imkan yaradıb.

Ötən il istiqrazlar vasitəsilə dövlət büdcəsinə 2406 mln. manat vəsait - DAXİL OLUB

FED.az xəbər verir ki, ekspert İntiqam Səfərəliyev  Mərkəzi Bankın notlarının hüquqi şəxslərə 9,5 faiz gəlir qazandırması barədə danışıb.

Bildirib ki, manatın emitenti olan Mərkəzi Bank, eyni zamanda, nominal dəyəri 10 min manat olan notların da emissiyasını həyata keçirir: “Manata və notlara maliyyə aktiv qismində yanaşdıqda, notların manatdan bir neçə fərqi var. İlk olaraq qeyd etmək lazımdır ki, manatı banklar vasitəsilə almaq və satmaq, eyni zamanda, notları investisiya şirkətləri vasitəsilə almaq və satmaq mümkündür. Manat müddət ərzində şirkətlərə heç bir gəlir yaratmır. Notlarda vəsaitin saxlanılması isə hüquqi şəxslərə illik 8-9,5 faiz gəlir qazandırır. Notların tez-tez alınıb satılmasından aylıq 2-3 faiz gəlir əldə etmək mümkündür. Notların müddəti var və həmin müddətin son tarixində Mərkəzi Bank hər bir not üçün 10 min manatı not sahibinin hesabına köçürür”.

İ.Səfərəliyev əlavə edib ki, Mərkəzi Bank hər həftə 120 milyon manatlıq notları hərrac yolu ilə satır. Mayın 18-də keçirilmiş hərracda 9 aylıq notlar ən ucuz qiyməti 9377 manat olmaqla satılıb.

İqtisadçı ekspert vurğulayıb ki, Mərkəzi Bankın qiymətli kağızını almış hüquqi şəxslər onları növbəti gündən etibarən bir saat ərzində ən azı 9400-10 min manat aralığında bir qiymətə sata bilərlər: “Mərkəzi Bankın notları ən likvid maliyyə alətidir. Şirkətlər qısamüddətli boş vəsaitlərindən qazanc məqsədilə məhz notlar vasitəsilə gəlir əldə edə bilirlər. Notları 9 ay investisiya hesabında saxladıqdan sonra Mərkəzi Bank gələn il yanvarın 25-də hər bir not üçün 10 min manatı investorun bank hesabına birbaşa ödəyir. Beləliklə, investor hər bir not üzrə 9 ay ərzində 623 manat qazanmış olacaq, 623 manat investisiya edilmiş 9377 manata nisbətdə 9,5 faiz illik qazanc deməkdir”.

Onun sözlərinə görə, şirkətlər üçün cari hesablarda olan qalıqlarını manatda saxlamaq heç bir gəlir gətirmədiyi halda, investisiya hesabında notda saxlamaqla illik əlavə 9,5 faiz qazanmaq daha faydalıdır: “Notlar vasitəsilə ən azı şirkətlər öz bizneslərindən gəlir əldə edərkən nağd vəsaitlərini də inflyasiyadan qoruyacaqlar. Burada risk amili sual yaradan nüans kimi ortaya çıxa bilər. Lakin burada fikir qətidir. Hər iki maliyyə alətinin emitenti Mərkəzi Bank olduğu üçün notların riski manatın riski ilə bərabərdir”.

İqtisadçı ekspert diqqətə çatdırıb ki, beş gündən artıq istifadəsiz vəsaiti olan şirkətlər və şəxslər risksiz qazancları əldə edə bilmək üçün mütləq investisiya şirkətləri ilə bu imkanları araşdırmalıdırlar. (Trend)

Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.