Cari ticarət həftəsinə 2 aylıq zirvəsindən qismən enişlə sakit başlayan DXY 103 bənd səviyyəsində mövqeyini qoruyur. İnvestorlar isə bu həftə avqustun 24-dən 26-na kimi baş tutacaq “Jackson Hole” Simpoziumunu gözləyirlər. Bu il konfransın əsas gündəm mövzusu “Qlobal İqtisadiyyatda Struktur Dəyişikliklər” olacaq. Simpoziumda çıxış edəcək ABŞ FED sədri Jerom Pavelin həm ABŞ iqtisadiyyatı, həm də qlobal bazarla bağlı şərhləri yaxından izləniləcək.
“InvestAZ”dan dünya maliyyə bazarları ilə bağlı - HƏFTƏLİK ANALİZ
Son bir həftədə dollar avro qarşısında təxminən 0.7% bahalaşıb. Dollar Asiya regionu valyutalarına qarşı da güclü perspektiv nümayiş etdirib. Belə ki, USD Yaponiyanın keçən il məzənnəyə müdaxilə etdiyi səviyyələrə çataraq, yen qarşısında illik ən yüksək səviyyələri test edir.
Digər tərəfdən, Çinin faiz endirimi bazar tərəfindən xəyal qırıqlığı kimi şərh edildi. Çin kredit tələbini stimullaşdırmaq məqsədilə illik kredit faiz dərəcəsini ən azı 15 baza bəndi proqnozlaşdırılsa da, 10 baza bəndi aşağı salıb. Bundan əlavə, yuan sürətlə ucuzlaşsa da, 5 illik faiz dərəcəsinin sabit saxlanılması bazar tərəfindən mənfi qarşılanıb. Məlumatlara görə, Çinin əsas dövlət bankları son həftə ərzində həm ölkədə, həm də ofşor bazarda yuanı almaqla valyutanın aşağı yönlü dəyişkənliyini kompensasiya etməyə çalışıblar.
USD/CNY keçən həftəni 7.28 səviyyəsində bağlasa da, qismən enişlərə baxmayaraq, dollar həftəlik olaraq yuana qarşı dəyər qazanmağa davam etdi. Yeni həftədə də artım tendensiyasını davam etdirən USD/CNY 7.31 səviyyəsinə çatıb və ilin pik səviyyəsini yenidən sınaqdan keçirib.
Çindəki mənfi tendensiya qlobal bazarlar üzərində təzyiq yaratmağa davam edərkən, FED sədrinin “Jackson Hole” Simpoziumunda çıxışının bazarlara yön verə biləcəyi düşünülür.
Dollara tələbin artması iyulun ortalarından etibarən qızılın ucuzlaşmasına da təsir göstərir. Qiymətli metallar bazarında hazırkı görünüşündə hələ də “güvənli liman” missiyasını üzərinə götürməyən, XAU/USD 5-ci həftəyə daşıdığı eniş trendində 1885$-a kimi ucuzlaşsa da, “ayılar” hələ də bu dəstək həddini qırmağa müəssər ola bilmirlər. Lakin qızılnın bir unsiya üzrə qiyməti 1905$ həddinin altında qaldığı müddətcə eniş tendensiyası davam edə bilər
Bugün isə Amerikada ikinci əl mənzil bazarında satış rəqəmləri investorların diqqət mərkəzində olacaq.
Məlumat InvestAZ İnvestisiya Şirkəti"nin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
