Vaxtilə "Para Bank" 20% ətrafında faizlər ilə əmanət cəlb etməsilə diqqəti cəlb edirdi. Bazarda əmanət faizləri 12% ətrafında olduğu halda "Para Bank"ın yüksək faizlə əmanət cəlb etməsi bankın riskli olduğuna işarə idi. Həmin vaxt, "Para Bank"ın rəhbərliyi hər şeyin "super" olduğunu bildirirdilər. Amma çox keçmədi Bankın lisenziyası ləğv edildi.

Adətən etibarlı, dayanıqlı maliyyə təşkilatları aşağı gəlir faizləri təklif edirlər. Bu, həmin təşkilatlarda risklərin aşağı olması ilə bağlıdır. Riskli hesab edilən kredit təşkilatları isə yüksək faizlər ilə əhalini və investorları şirnikləndirməyə çalışırlar. Yüksək faizlər, xərc yükünü də artırır, bankı daha kövrək edir.

Elə götürək sonuncu hadisəni - "Dəmir Bank"ın lisenziyasının ləğv edilməsini. Əmanətlərin Sığortalanması Fondu, media tərəfindən dəfələrlə milli valyutada illik 15% dərəcəsinədək, xarici valyutada isə 3% dərəcəsinədək yerləşdirilən əmanətlərin sığortalandığı bəyan edilsə də, "Dəmir Bank"da 23,5 milyon manat qorunmayan əmanətin olduğunun açıqlanması təəccüb doğurur. Görünən budur ki, bir sıra insanlar nəfislərini cilovlaya bilmirlər.

Qorunmayan əmanətlərin artmasında xarici valyutada yerləşdirilən əmanətlər üzrə sığorta faizinin 3% olmasının da rolu var. Bəzi banklar Dollar əmanətlərində yüksək faizlər təklif edərək, qorunmayan əmanətlərin artmasına səbəb olurlar.

“Dəmir Bank” da ötən illərdə 15%-dən yüksək faizlər ilə əmanət cəlb etməsilə diqqəti cəlb edirdi.

Hazırda bağlanan bankların yolu ilə gedərək yüksək faizlə əmanət cəlb edən banklardan biri Turan Bankdır. Bu bankda əmanət faizləri əsasən 16-18,5% intervalındadır ki, bu faiz dərəcələri ilə yerləşdirilən əmanətlər sığortalanmır. Bankın saytında yer alan məlumata görə (https://turanbank.az/ferdi-bankchiliq/man-tl-r/sirl-r-x-zin-si-kampaniyas/), Turan Bank "Sirlər Xəzinəsi" kampaniyası çərçivəsində 6 növ əmanət təqdim edir. Bu əmanət məhsullarından 4-ünün faizi 16% və ya daha yüksəkdir. Bankın yüksək faizlə əmanət cəlb etməsi vəsaitə ehtiyacının olduğuna və risklərə işarə edir. Əgər "Turan Bank" “Kapital Bank” qədər dayanıqlı və etibarlıdırsa 8%-lə əmanət cəlb etsin. Maliyyə dünyasında qəbul olunmuş qaydaya görə, yüksək gəlirlilik faizi risklərə işarədir.

Biz media olaraq vətəndaşlara bu məsələdə diqqətli olmağı tövsiyə edirik.

Bir daha diqqətinizə çatdırırıq ki, 2 mart 2016-cı il tarixdə qüvvəyə minən “Əmanətlərin tam sığortalanması haqqında” Azərbaycan Respublikasının Qanununun 3-cü maddəsinə əsasən Əmanətlərin Sığortalanması Fondunun Himayəçilik Şurası tərəfindən əmanətlər üzrə müəyyən edilmiş və 2 mart 2016-cı il tarixdən qorunan əmanətlər üçün tətbiq edilən maksimal illik faiz dərəcəsi- milli valyuta üzrə 15%, xarici valyuta üzrə 3% həddində olan Fondun iştirakçı banklardakı bütün qorunan əmanətlər məbləğindən asılı olmayaraq 3 (üç) il müddətində tam sığortalanır.

Bu faizdən yuxarı faiz dərəcəsi ilə yerləşdirilən əmanətlər qorunmur və bu əmanətlərə görə kompensasiya ödənilmir.

06 Dekabr 2017-ci il tarixində, 12 ay müddətinə, faizlərin götürülməsi şərtindən asılı olaraq banklarda əmanətlərin faiz dərəcələri aşağıdakı kimi olmuşdu. (Qeyd edək ki, banklar 13-36 ay müddətinə yerləşdirilən əmanələrə görə nisbətən yüksək faizlər təklif edirlər.)