"Azərbaycan Banklar Assosiasiyası" (ABA) İctimai Birliyinin yaradılmasından 35 il ötür. 1990-cı ildə kommersiya banklarının təsis etdiyi bu qurumun əsas məqsədi üzv-təşkilatların maraqlarını qorumaq, onların müxtəlif işgüzar xidmətlərə olan ehtiyaclarının ödənilməsinə yardım göstərmək və fəaliyyətlərini əlaqələndirməkdən ibarətdir. Hazırda 22 bank, 2 bank olmayan kredit təşkilatı (BOKT), "Azərbaycan Kredit Bürosu" MMC (AKB), "Millikart" MMC prosessinq mərkəzi, Rəqəmsal İnkişaf və Nəqliyyat Nazirliyinə istinadən "Azərpoçt" MMC ABA-nın üzvüdür.

Bank icması Azərbaycan Banklar Assosiasiyasının 35 illiyini - QEYD EDİR

FED.az xəbər verir ki, Assosiasiyanın Prezidenti Zakir Nuriyev müsahibəsində həm rəhbərlik etdiyi qurumun, həm də ölkənin bank sektorunun ötənilki fəaliyyəti ilə bağlı sualları cavablandırıb:

- Hörmətli Zakir müəllim, ABA-nın 35 illik yubileyi münasibətilə Sizi təbrik edirəm. Bu əlamətdar tarix, həm Assosiasiyanın, həm də bütövlükdə bank sektorunun keçdiyi yolu göstərir. Uğurlarınızın davamlı olmasını arzulayıram.

- Çox təşəkkür edirəm! ABA-nın 35 illik fəaliyyəti ərzində əldə olunan nəticələr birgə əməkdaşlıq və davamlı inkişafın göstəricisidir. Gələcəkdə də bu missiyamıza sadiq qalaraq, sektorun daha da güclənməsi üçün çalışacağıq.

- Ötən il bank sektorunda bir çox yenliklər və dəyişikliklər oldu. Bu müsahibədə biz böyük hissəsinin Sizin şərhinizdə əhatələcəyini gözləyirik. İlk olaraq, strateji baxışla başlayaq: “2024-2026-cı illərdə maliyyə sektorunun inkişaf Strategiyası” bank sektorunda hansı əsas prioritetləri müəyyənləşdirir və bu strategiyanın ötən ilki fəaliyyətlərə təsiri necə olub?

- Ötən il Azərbaycan Mərkəzi Bankı (AMB) “2024-2026-cı illərdə maliyyə sektorunun inkişaf Strategiyası”nı təsdiqlədi. Strategiya ölkənin bank sektorunun dayanıqlığının möhkəmləndirilməsini, eləcə də sığorta, kapital bazarları və ödəniş sektorlarının inkişafını əsas prioritetlər kimi müəyyənləşdirir. Burada maliyyə inklüzivliyinin genişləndirilməsi, xidmətlərin əlçatanlığının artırılması, maliyyə alətlərinin diversifikasiyası, sektorun səmərəliliyinin yüksəldilməsi, korporativ idarəetmənin tətbiqi, həmçinin şəffaflıq və dayanıqlığın gücləndirilməsi kimi strateji hədəflər vurğulanır. Bundan əlavə, sənəd hər sektorun potensial bazar imkanlarını, AMB-nin keyfiyyət standartlarını və risk əsaslı nəzarət mexanizmlərini müəyyən edir. Həmçinin, rəqəmsal və dayanıqlı maliyyə, peşəkar inkişaf, bazar davranışlarına nəzarət və əhalinin maliyyə savadlılığının artırılması kimi əsas istiqamətlərə də xüsusi diqqət yetirilir.

Yeni strategiyanın qəbulu və bank sektorunun maliyyə göstəricilərində müşahidə edilən müsbət irəliləyişlərlə yanaşı, 2024-cü il qanunverciliyin və requlyativ çərçivənin yenilənməsi, banklarda və maliyyə sektorunda korporativ idarəetməyə yeni baxışın gətirilməsi, risk yanaşmalarının müasir dövrün tələblərinə daha da uyğunlaşdırılması, ödəniş sistemləri və rəqəmsal bankçılığın təkmilləşdirilməsi, ekoloji, sosial və idarəetmə (ESİ) prinsiplərinin inteqrasiyası, habelə dayanıqlı maliyyənin bünövrəsinin formalaşdırılması baxımından da olduqca məhsuldar bir il oldu.

- 2024-cü ildə bank sektoru əsas maliyyə göstəricilərində hansı mühüm nəticələr əldə olunub?

- Ötən il baş vermiş xarici geosiyasi proseslərin yaratdığı qeyri-müəyyənliklərə baxmayaraq Azərbaycanda mövcud olan sosial və iqtisadi sabitlik və inkişaf fonunda ölkəmizin bank sektoru dayanıqlı fəaliyyətini davam etdirmişdir. Bank sektorunun kapital və likvidlik göstəriciləri normativləri əhəmiyyətli üstələmişdir. Belə ki, hesabat ilində bank sektorunun məcmu kapitalı 10,8 % (0,6 milyard manat) artaraq 6,2 milyard manata çatıb. Bank sektorunun kapital adekvatlığı 17,6% olmaqla minimum requlyativ tələbi (minimum tələb adi banklar üçün 10 %, sistem əhəmiyyətli banklar üçün 12 %-dir) 1,7 dəfə üstələyib. Bununla yanaşı, hesabat ilinin sonuna bank sektorunun likvid aktivləri 14,2 milyard manat olmaqla cəmi aktivlərin 26,9 %-ni təşkil edib. Ani likvidlik əmsalı 51,9 % (minimum normativ 30 %) olmaqla minimum tələbi 1,7 dəfə üstələyib. Bank sektoru üzrə məcmu likvidliyin örtülmə əmsalı 150,1 %, xarici valyutada üzrə isə 178 % olmaqla, requlyativ tələbi əhəmiyyətli dərəcədə üstələyib (sistem əhəmiyyətli banklar üçün minimum tələb 90 %, digər banklar üçün 80 %).

Eyni zamanda, fiziki şəxslərin əmanətlərinin dollarlaşma əmsalı 34,3 % təşkil edib. Həmçinin, 2024-cü ilin sonuna kredit təşklilatlarının vaxtı keçmiş kreditlərinin cəmi portfeldəki payı tarixi rekord aşağı səviyyə olan 1,5% olub. Başqa sözlə, makroiqtisadi və maliyyə sabitliyi hədəflərinə xələl gətirmədən bank sektorunun kredit portfelinin artımı iqtisadi fəallığa müsbət töhfə verib.

Ötən ilin sonunda ölkədə 22 bank (o cümlədən, 2 dövlət bankı) fəaliyyət göstərib. Fəaliyyətdə olan banklardan 9-nun kapitalının strukturunda xarici kapital iştirak edir. Bankların xidmət şəbəkəsi 485 filial, 88 şöbə (mübadilə şöbələri daxil olmaqla), 3 230 ATM və 25 363 əməkdaş vasitəsilə təmin edilir.

Bank sektorunun cari vəziyyəti və inkişaf trendləri də sektorun daha dayanıqlı, sağlam bünövrəyə keçidinə fokuslanan strateji baxışla bir tandem təşkil edir. Belə ki, bankların aktivlərinin məbləği 2024-cü ilin sonuna 53 milyard manat təşkil edib ki, bu da 2023-cü ilin sonu ilə müqayisədə 7,8 % (3,8 milyard manat) çoxdur. Kredit portfelindəki artım isə aktivlərin artım tempini 2,4 dəfə üstələyərək 18,5 % təşkil edib və ümumilikdə portfelin məbləği 27,5 milyard manat (il ərzində mütləq artım 4,3 milyard manat) səviyyəsinə yüksəlib. O cümlədən, biznes kreditləri 17,2 %-lik artımla 14,8 milyard manata çatıb. Dövlət fondları nəzərə alınmadan, yalnız bankların vəsaiti hesabına real sektora verilmiş kreditlərinin məbləğindəki artım isə ümumi kredit portfelindəki artımı da üstələyərək 18,7 % olub. 2024-cü ilin sonuna biznes kreditləri cəmi kredit portfelinin 53,8 %-ni təşkil edib.

Depozit portfeli isə təqribən 9,1 %-lik artım ilə 37,7 milyard manata çatıb. Bununla yanaşı, fiziki şəxslərin əmanətlərinin məbləği il ərzində 13,6 % və yaxud 1,7 milyard manat artaraq, 14,3 milyard manata yüksəlib. Mütləq ifadədə artım sabit maliyyələşmə mənbəyi olan müddətli əmanətlər hesabına təmin edilib (il ərzində 25 % və ya 1,7 milyard manat artım). Fiziki şəxslərin əmanət portfelinin 60,1 %-i (8,6 milyard manat) müddətli əmanətlərdən ibarətdir. Hüquqi şəxslərin tələbli depozitləri 17,6 milyard manat olmaqla, hüquqi şəxslərin cəmi depozit portfelinin 75,1 %-ni təşkil edib.

Eyni zamanda, bank sektorunda unikal əmanətçilərin (müddətli əmanətləri olan) artımı da müşayiət olunmuşdur. 2024-cü ildə unikal əmanətçilərin sayı 43 796 nəfər və yaxud 41 % artaraq ilin sonuna 150 519 nəfərə çatıb ki, bunun da 78 %-i əmanət məbləği 30 min manata qədər olan əmanətçilər üzrədir. Başqa sözlə desək, 2024-cü ildə banklara əmanət qoyan 43,8 min nəfər yeni unikal əmanətçidən, yəni daha əvvəllər banklarda müddətli əmanət hesabı olmamış fiziki şəxslərdən 34 min nəfərinin müddətli əmanətinin məbləği 30 min manata qədər olub.

Müsbət dinamikaya AMB-nin makroiqtisadi və maliyyə sabitliyi istiqamətində həyata keçirdiyi davamlı tədbirlər fonunda əhalinin bank sektoruna artan inamı ilə yanaşı, ötən dövrdə Vergi Məcəlləsinə edilmiş dəyişikliklərlə illik faiz gəliri 2 400 manata qədər olan əmanətlər, eləcə də, milli valyutada 18 ay və daha artıq müddətə yerləşdirilmiş müddətli əmanətlər üzrə faiz gəlirlərinin vergidən azad edilməsi pozitiv təsir göstərib.

Sektorun ötən il ərzində əldə etdiyi faiz gəliri 4 milyard manat olub, xalis mənfəətin məbləği isə 1 milyard manatı üstələyib.

AKB-yə müraciətlərdə aktivlik davam edib. 2024-cü ildə Büroya daxil olan ümumi sorğu sayı 185,4 milyon (o cümlədən, toplu sorğu sayı 166 milyon), skorinq sorğularının sayı isə 13,2 milyon ədəd olub.

Banklar və “Azərpoçt” MMC sistemləri üzrə dekabr ayının sonunda dövriyyədə olan ödəniş kartlarının sayı 17,6 % və yaxud 3 milyon ədəd artaraq 19 milyon 899 min ədəd təşkil edib. Ödəniş kartlarında artım debet kartları üzrə 19,9 %, kredit kartları üzrə 1,8 % təşkil edib. Bununla yanaşı, 2024-cü ildə ödəniş kartları ilə ölkə daxilində aparılmış əməliyyatların məbləği 78,9 milyard manata yüksəlib ki, bu da 2023-cü il ilə müqayisədə 61 % çoxdur. Ötən il ödəniş kartları ilə ölkə daxilində aparılan ödəniş əməliyyatlarının 64,2 %-i nağdsız formada həyata keçirilib.

Banklar və “Azərpoçt”un ödəniş xidməti şəbəkələri üzrə dinamik artım müşahidə olunur. 2023-cü ilin sonu ilə müqayisədə bankomatların sayı 6,2 %, POS-terminalların sayı 38,4 % artıb.

- ABA-nın təşəbbüsü ilə 2024-cü ildə bank sektorunu əhatə edən qanunvericilikdə hansı əsas dəyişikliklər həyata keçirilib və bu dəyişikliklərin sektorun fəaliyyətinə necə təsir etdiyi müşahidə olunub?

- 2024-cü ildə ABA-ya üzv bankların ekspertləri bəzi qanunvericilik aktlarına dəyişikliklərin edilməsi məqsədi ilə bir sıra rəy və təkliflər verib. Belə ki, Mülki Məcəllə, Mülki Prosessusal Məcəllə, “Banklar haqqında” Qanun, “İpoteka haqqında” Qanun, “Reklam haqqında” Qanun, “Banklarda korporativ idarəetmə Standartları”, “Banklarda kredit risklərinin idarə edilməsi Qaydası”, “Banklara aidiyyəti olan şəxslərlə əməliyyatların aparılması Qaydası, həmçinin yeni hazırlanan İcra Məcəlləsi layihəsinə müxtəlif dövrlərdə rəy və təkliflər təqdim edilib. Həmçinin, “Xüsusi tənzimləmə rejiminin tətbiqi Qaydası”, “Gücləndirilmiş müştəri autentifikasiyasının tətbiqi Qaydaları”, “Müştəri uyğunluğu və yeni texnologiyaların tətbiqi zamanı verifikasiya tədbirlərinə, risk faktorlarının müəyyən edilməsinə və müştəri profilinin risk qruplarına aid edilməsinə dair Qaydalar” istiqamətləri üzrə də müvafiq tövsiyə sənədləri hazırlanıb, bu sahəni tənzimləyən qanunvericilik aktlarının təkmilləşdirilməsi ilə bağlı təkliflər təqdim edilib.

Eyni zamanda, ötən il requlyator ödəniş təşkilatları və elektron pul təşkilatlarının fəaliyyətinin təşkili və həyata keçirilməsi, bankların həyata keçirəcəyi investisiya xidmətlərinin məbləği və qaydası, dövlət-özəl sektor tərəfdaşlığının həyata keçirilməsinin təşkilati və hüquqi əsasları, maliyyə bazarlarında fəaliyyətinə nəzarət edilən subyektlərdə informasiya təhlükəsizliyinin təmin edilməsinə dair tələblər, kredit müqavilələri üzrə zaminin məsuliyyətinin konkretləşdirilməsi məsələlərini tənzimləyən qaydaları qəbul edərək təsdiq edib. Ən mühüm dəyişiklikər içərisində kommersiya mübahisələri üzrə məhkəməyə müraciət etməmişdən əvvəl ilkin mediasiya sessiyasında iştirak tələbi artıq aradan qaldırılaraq, “Arbitraj haqqında” qanunun qüvvəyə minməsi ilə bu mübahisələrin məhkəmədən kənar alternativ həll vasitəsi kimi arbitrajda həll edilə bilmə, kredit müqavilələri üzrə borcalanın həyatının ölüm halından və əmək qabiliyyətinin itirilməsi hallarından sığortalanması imkanlarını göstərmək olar.

Bunlarla yanaşı, AMB “Kredit riskləri, o cümlədən iri kredit riskləri ilə bağlı prudensial normativ və tələblərə dair Qayda”, "Aktivlərin təsnifləşdirilməsi və mümkün zərərlərin ödənilməsi üçün xüsusi ehtiyatların yaradılması Qaydası”, “Bank kapitalının və onun adekvatlığının hesablanması Qaydaları”, "Banklara aidiyyəti olan şəxslərlə əməliyyatların aparılması Qaydası", “Mərkəzi Bankla banklar arasında xarici valyutanın alqı-satqısı Qaydası”, “Rezidentlərin xarici valyutada, habelə qeyri-rezidentlərin milli və xarici valyutada əməliyyatlarının aparılması Qaydaları” və “Kredit təşkilatlarında kassa əməliyyatlarının aparılması, nağd pul və digər qiymətlilərin saxlanması və inkassasiyası Qaydası”nda dəyişikliklər edib.

Həmçinin, 2024-cü ildə yeni Rəqabət Məcəlləsi qüvvəyə minib. Bu sənəd bazar iştirakçıları arasında üfüqi və şaquli razılaşmalara dair müfəssəl meyarlar və tələblərlə rəqabətin gücləndirilmiş tənzimlənməsi üçün əsaslar təqdim edəcək.

- Rəqəmsal ödənişlər və rəqəmsal bankçılığın inkişafı istiqamətində 2024-cü ildə hansı əsas addımlar atılıb və bu sahədə ABA-nın rolu nə olub?

- Rəqəmsal ödəniş ekosisteminin rəqabət qabiliyyətinin daha da artırılması və innovativ ödəniş texnologiyalarının tətbiqinin genişləndirilməsi, habelə rəqəmsal bankçılığın təşviqi istiqamətində ABA öz fəaliyyətini 2024-cü ildə də davam etdirib.

İlk növbədə növbəti illər ərzində bu sahənin uğurlu inkişafı və təhlükəsizıliyinin təmin olunması üçün aparılan qanunvericilik islahatları qeyd edilməlidir. Belə ki, ödəniş əməliyyatlarının aparılması və ödəniş xidməti təchizatçıları arasında hesablaşmaların həyata keçirilməsi, ödəniş alətlərinə, o cümlədən elektron pula və kiçik məbləğli və eyniləşdirilməsi tələb edilməyən ödəniş alətlərinə, habelə məsafədən aparılan ödəniş əməliyyatları üzrə təhlükəsizlik səviyyəsinin beynəlxalq təcrübəyə əsasən təmin edilməsi məqsədilə gücləndirilmiş müştəri autentifikasiyasına dair tələblər qanunvericilikdə müəyyən edilib.

Rəqəmsal ödənişlər sahəsində daha dolğun göstəricilərin əldə edilməsi və təhlillərin dərinləşdirilməsi məqsədilə ödəniş xidməti təchizatçılarının hesabatlığı təkmilləşdirilib, müfaviq qaydalara dəyişikliklər həyata keçirilib.

Maliyyə inkluzivliyinin inkişaf etdirilməsi sahəsində mühüm alətlərdən biri olan ödəniş agentlərinin fəaliyyəti, ödəniş xidməti təchizatçılarının ödəniş agentləri ilə qarşılıqlı əməkdaşlığı üzrə tələblər təsdiq edilib.

Rəqəmsal ödənişlərin təşviqi və əhatə dairəsinin daha da genişləndirilməsi, habelə iqtisadi subyektlərdə nağdsız ödənişlərin qəbulunun təşviqi məqsədilə ödəniş kartları ilə aparılan əməliyyatlarda tətbiq edilən interçeync xidmət haqları təhlil edilib və AMB ilə birgə əməkdaşlıq çərçivəsində bu xidmət haqları üzrə yuxarı həddin müəyyən edilməsində yaxından iştirak edilib.

Həmçinin ödəniş kartları ilə aparılan əməliyyatlarda interçeync xidmət haqlarının düzgün təyin edilməsi, rəqəmsal ödənişlərin stimullaşdırılması tədbirlərinin daha effektiv formada icrası, habelə fırıldaqçılıq əməliyyatlarına qarşı mübarizə tədbirləri çərçivəsində təsərrüfat subyektlərinin ticari kodlarının ümumi siyahısı müəyyən edilərək AMB-yə təqdim edilib.

Rəqəmsal bankçılıq xidmətlərinin inkişaf etdirilməsi və bu sahədə qanunvericlik islahatlarının aparılması məqsədilə təkliflər paketi hazırlanaraq AMB-yə təqdim edilib. Rəqəmsal bankçılıq və ümumən rəqəmsal transformasiya sahəsində aparılan proseslərin daha da sürətləndirilməsi, yeni layihələrin effektiv qaydada planlaşdırılaraq real mühitdə tətbiqi məqsədilə AMB nəzdində innovasiya mərkəzinin “innovation hub” yaradılması təklifi ilə çıxış etmişik.

Ödəniş kartları ilə aparılan əməliyyatlarda xərclərin optimallaşdırılması və bankların investisiya imkanlarının genişləndirilməsi məqsədilə beynəlxalq ödəniş sistemlərinin artan xərc maddələri təhlil edilərək daimi əsasda ödəniş sistemləri və AMB qarşısında məsələ qaldırılıb. Bu istiqamətdə birgə fəaliyyətin təmin edilməsi üçün aparıcı ekspertlərdən ibarət işçi qrupu formalaşdırılıb.

- Bank sektorunda şəffaflığın və təhlükəsizliyin artırılması istiqamətində ABA-nın 2024-cü ildə həyata keçirdiyi komplayens və fırıldaqçılıqla mübarizə tədbirləri barədə məlumat verə bilərsinizmi?

- ABA-nın Komplayens Ekspert Qrupu “Müştəri uyğunluğu və yeni texnologiyaların tətbiqi zamanı verifikasiya tədbirləri” ilə əlaqədar banklar arasında əməkdaşlıq və təcrübə mübadiləsi həyata keçirib, FATCA/CRS tələbləri “Maliyyə vəsaitlərinin elektron köçürülməsi zamanı müştəri uyğunluğu tədbirlərinin tətbiq edilməsi qaydası” və digər istiqamətlərdə təkliflər hazırlayıb.

Bunlarla yanaşı, fırıldaqçılıq hallarının qarşısının alınması istiqamətində ABA bir çox işlər görüb. Ötən il ABA-nın “Rəqəmsal ödənişlər sahəsində fırıldaqçılıq əməliyyatlarına qarşı mübarizə” Ekspert Qrupu fırıldaqçılıqla mübarizə istiqamətində ümumi prinsiplər, səlahiyyətlər, dələduzluğun aşkarlanması texnologiyalarının tətbiqi, şübhəli əməliyyatların monitorinqi üzrə prosedur, fırıldaqçılıq rıldaqçılıq insidentləri və risklərin idarə edilməsi də daxil olmaqla, dələduzluq əməliyyatlarına qarşı mübarizənin təşkilini müəyyən edən normativ sənədlərlə və digər əlaqədar istiqamətlərdə təkliflər hazırlayıb, eyni zamanda, mövcud fırıldaqçılıq mexanizmləri, o cümlədən sosial mühəndislik, hesabların ələ keçirilməsi, telefon bankçılığı ilə fırıldaqçılıq və saxta hesablar vasitəsilə çirkli pulların yuyulması və dələduzluq sxemlərini təhlil edilib və aşkarlanması, qarşısının alınması istiqamətində birgə mübarizə mexanizmləri və qabaqlayıcı tədbirlər hazırlanıb tətbiq edilib.

- 2024-cü ildə ABA-nın həyata keçirdiyi Korporativ Sosial Məsuliyyət layihələri sırasında diqqətçəkən təşəbbüslər hansılar olub və bu layihələrin sosial təsiri necə dəyərləndirilir?

- ABA Korporativ Sosial Məsuliyyət çərçivəsində bir çox layihəyə imza atıb. Bunlar, “Biləsuvar Bağça-Məktəb-Lisey Kompleksi”ndə 2023/2024-cü tədris ilində 25 nəfər Şəhid ailəsinin övladlarının 100 %, 11 nəfər isə Azərbaycanın Ərazi Bütövlüyü Uğrunda Əlil olan şəxslərin övladlarının 50 % təhsil xərclərinin ödənilməsi, 5 sentyabr – “Bilik Günü” münasibətilə Əmək və Əhalinin Sosial Müdafiəsi Nazirliyi yanında Dayanıqlı və Operativ Sosial Təminat (DOST) Agentliyi və tərəfdaş qurumların təşkilatçılığı ilə həyata keçirilən “DOST Sevinci” layihəsi çərçivəsində Masallı rayonunun dağ kəndlərində yaşayan 193 ibtidai sinif şagirdinə məktəb ləvazimatlarının və geyim əşyalarının təqdim edilib, “İrsimizi yaşadaq” və “Ustad dərslərinin keçirilməsi” KSM layihələrinə də maliyyə dəstəyi göstərilməsi, ölkənin ərazi bütövlüyünün təmin edilməsi, torpaqlarımızın düşmən işğalından azad olunması uğrunda Şəhid olmuş qəhrəmanlarımızın ali məktəblərə daxil olmuş həyat yoldaşlarının kompüter texnikası ilə təmin edilməsi, Füzuli rayonunun Böyük Bəhmənli kəndinin ərazisində yerləşən Şəhidlər Parkının yenilənməsinə dəstək verilməsi, Naxçıvan Muxtar Respublikasının Kəngərli rayonunda 10 hektar ərazidə əkilmiş ağaclar üçün suvarma sisteminin qurulmasında istifadə ediləcək olan mal-material alışının təşkil edilməsi, Biləsuvar Bağça-Məktəb-Lisey Kompleksinin təmir işlərinin aparılmasına dəstək verilməsi, əlilliyi olan vətəndaşlara göstərilən maliyyə xidmətlərindəki ayrı-seçkiliyin aradan qaldırılması, xidmət zamanı bərabər imkanların təmin edilməsi, göstərilən xidmətlərin keyfiyyətinin artırılması və təkmilləşdirilməsi, eləcə də bu şəxslərin maliyyə əlçatanlığının artırılması istiqamətində işlərin həyata keçirilməsidir.

Bunlarla yanaşı, 2024-cü il ərzində banklar Yaşat Fonduna iyanələrin edilməsini davam etdirib. Bununla da, bank sektorunun Fonda indiyə qədər etdiyi ianələrinin məbləği 3,2 milyon manatı ötüb.

- 2024-cü ildə əldə olunan nəticələr fonunda 2025-ci il üçün bank sektorunda hansı əsas prioritetlər və gözləntilər var?

- Göründüyü kimi, ötən il qanunvericilikdə və requlyativ çərçivədə baş verən dəyişikliklərlə, kəmiyyət və keyfiyyət göstəricilərində, eləcə də ödəniş sistemləri, rəqəmsallaşma, dayanıqlılıq, maarifləndirmə, beynəlxalq əlaqələr, komplayens, fırıldaqçılıq hallarının qarşısının alınması və bank sektorunun digər sahələrində baş verən əhəmiyyətli və müsbət irəliləyişlər və yeniliklərlə yadda qalıb.

Vurğulamaq lazımdır ki, icrası davam edən və ilkin nəticələrinin 2025-ci ildə ictimaiyyətlə bölüşəcəyimiz bir çox layihə çərçivəsində də işlər davam edirilməkdədir.

Önümüzdəki 2025-ci ilin də bu inkişaf tempinin qorunacağına, üzvlər və tərəfdaşlarla birlikdə böyük nailiyyətlərə imza atılacağına tam olaraq inanırıq. Bank sektoru olaraq, AMB və digər dövlət qurumları ilə dövlət-özəl sektor dialoqu çərçivəsində bu istiqamətdə lazım olan bütün dəstəyin göstəriləcəyinə əminliyimizi və ölkəmizin beynəlxalq reytinqlərdə layiqli yer tutmasına olan inamımızı bir daha bəyan etmək istəyirəm. (Report)