2025-ci ildə gəlirlərini artıran banklardan biri də “Paşa Bank” olub.

Azərbaycanda banklar pulu nədən qazanırlar? – GƏLİR MƏNBƏLƏRİ, MƏBLƏĞLƏR – BANKLAR (31.12.2025)

FED.az Azərbaycanın ən böyük banklarından olan “Paşa Bank”ın gəlir mənbələrini araşdırıb.

Ötən il «Paşa Bank»ın ümumi gəlirləri 803 milyon 377 min manat olub. Bu 2024-cü illə müqayisədə 80 milyon manat və ya 11,5% artıqdır.

«Paşa Bank» bank biznesinin bütün istiqamətlərindən gəlir əldə edə bilir. Hesabat dövründə bankın gəlirlərinin ən böyük hissəsi – 301 milyon 608 min manatı və ya ümumi gəlirlərin 37%-i bankın kredit portfelinin gəlirlərindən formalaşıb. Bu sahədən gəlirlər 2024-cü illə müqayisədə 36 milyon manat və ya 13,7% çox olub.

Komissiya haqlarından isə 173 milyon 730 min manat daxil olub. “Paşa Bank” bu göstəriciyə görə, ölkədə «ABB» və «Kapitalbank»dan geri qalıb. Komissiya haqlarından daxilolmalar ümumi gəlirlərin 21%-ini təşkil edib və bir ildə 6,2% artıb.

Banka daha 43 milyon 323 min manat isə valyuta əməliyyatlarından daxil olub – bu, ümumi gəlirlərin 5%-ini təşkil edib. Bu gəlirlər də bir il əvvələ nisbətən 8% çoxalıb.

Bank ötən il ərzində qiymətli kağızlardan 114 milyon 530 min manatdan artıq gəlir əldə edib. Bankın bütün gəlirlərinin 14%-i qiymətli kağız bazarından daxil olub. Ümumiyyətlə “Paşa Bank” ölkədə qiymətli kağızlara ən çox yatırım edən banklardan biridir. Qiymətli kağızlardan gəlirlər bir ildə 9,5% azalıb.

Ümumi gəlirlərin təqribən 12%-i və ya 125 milyon manatdan çoxu bankın başqa banklara yerləşdirilən depozit və kreditlərdən daxil olub. Bunlar da müvafiq olaraq 52,5% və 35,4% artım göstərib.

Bütün bunlardan başqa, bankın 50 milyon manata yaxın digər faiz və qeyri-faiz gəlirləri də olub. Faiz və qeyri-faiz gəlirləri ümumi gəlirlərin 7%-ini tutub. Faiz gəlirləri bir il əvvələ nəzərən 3,2 dəfə azalsa da, digər qeyri-faiz gəlirləri 2,7% artıb.

2024-2025-ci illər ərzində “Paşa Bank”ın gəlirlərinin məbləği, onun ümumi gəlirlərdəki payı və gəlirlərin məbləğinin illik dinamikası aşağıdakı kim olub: