Bank

Mərkəzi Bankdan açıqlama: «Xarici şok şəraitində…»

Mərkəzi Bankdan açıqlama: «Xarici şok şəraitində…» | FED.az
15:39 19 Mart 2020

Azərbaycan Mərkəzi Bankı neftin qiymətinin kəskin enməsi ilə bağlı yaranan vəziyyəti xarici şok kimi qiymətləndirir.

Eləcə də bax: Mərkəzi Bank faiz qərarını - AÇIQLAYIB

FED.az xəbər verir ki, bu barədə Bankın açıqlamasında bildirilir. Açıqlamada deyilir ki, AMB-nin İdarə Heyəti uçot dərəcəsinin 7.25% səviyyəsində dəyişməz saxlanılması haqqında qərar qəbul edib. Faiz dəhlizinin yuxarı həddi 9% saxlanılmaqla aşağı həddi 6.75%-ə qaldırılmışdır.

Bu qərar başlıca olaraq İdarə Heyətinin pul siyasətinə həsr olunmuş son iclasından keçən dövrdə qlobal mühitdə baş verən əhəmiyyətli dəyişikliklər və onun təsiri altında yaranmış qeyri-müəyyənliklər nəzərə alınmaqla qəbul edilmişdir.

Mart ayının əvvəllərindən koronavirus pandemiyasının qlobal iqtisadiyyata mənfi təsirlərinin artdığı şəraitdə əsas neft ixracatçıları arasında OPEK+ sazişinin uzadılmaması neftin qiymətinin cari ildə 2 dəfədən çox azalması ilə nəticələnmişdir.

«Xarici şok şəraitində Azərbaycan hökuməti və Mərkəzi Bankın koordinasiya olunmuş fəaliyyəti nəticəsində valyuta bazarında tarazlıq təmin edilir. İlin əvvəlindən inflyasiya səviyyəsində əhəmiyyətli dəyişiklik baş verməmiş, 12 aylıq inflyasiya 2.9% olmaqla hədəf diapazonunun mərkəzindən aşağıda qalmışdır. Pul bazası ilin əvvəlindən 11% azalmışdır ki, bu da monetar şəraitin sərtləşməyə başladığını göstərir»-dey bildirilir.

Buna baxmayaraq dövr ərzində iqtisadi aktivlik qorunmuş, iqtisadi artım 2.8%, qeyri-neft sektorunda iqtisadi artım isə 6.7% təşkil etmişdir.

Qlobal iqtisadiyyatdan gələn qeyri-monetar şokun həm ölkədaxili tələbə, həm də təklifə mənfi təsirləri Mərkəzi Bankın qiymət və maliyyə sabitliyi ilə iqtisadi aktivlik və məşğulluğun dəstəklənməsi arasında balanslı mövqe tutmasını şərtləndirir.

Son illər ölkədə yaradılmış iqtisadi və maliyyə potensialı qeyd olunan məqsədlər toplusunu optimallaşdırmaq üçün yetərli səviyyədədir. Mərkəzi Bank izafi pul kütləsinin sterilizasiyası üçün öz portfelini genişləndirəcək, zəruri hallarda arsenalındakı mövcud alətlərlə bank sisteminin likvidlik tələbatını tam ödəyəcəkdir.

Yaranmış vəziyyətdə Mərkəzi Bank qlobal mühitdə və ölkə iqtisadiyyatında gedən prosesləri gündəlik əsasda monitorinq edir, xarici şokun ölkə iqtisadiyyatına təsirlərinin miqyasını qiymətləndirmək üçün davamlı təhlillər aparır.

Digər xəbərlər

Banner