Ötən il “Bank Avrasiya”nın faiz gəlirləri 10 milyon 957 min manat (1,1% azalma), faiz xərcləri 1 milyon 946 min manat (19% azalma) təşkil edib.

FED.az Bankın hesabatına istinadən xəbər verir ki, bankın kreditlərdən əldə etdiyi faiz gəliri 9 milyon 376 min manat (20,6% artım), qiymətli kağızlardan qazancı isə 992 min manat (2,5 dəfə azalma) təşkil edib. 

Ötən il «Bank Avrasiya»nın depozitlər üzrə ödədiyi faizlər 36% azalaraq 662 min manata düşüb.

Nəticədə bankın xalisə faiz gəliri 9 milyon 11 min manat olub (4% artıb).

Bankın qeyri-faiz gəlirləri isə 16,3% azalaraq 1 514 min manata enib. 2020-ci ildə «Bank Avrasiya»da haq və komissiya gəlirləri də 16%-ə yaxın azalaraq 1 milyon 147 min manata enib.

Ötən il bankın qeyri-faiz xərcləri 200 min manat azalaraq 4 milyon 977 min manat enib. Amma bank işçiləri bunu hiss etməyiblər – 2020-ci ildə «Bank Avrasiya»da əmək haqları 100 min manat və ya 5%-dən çox artaraq 2 163 min manata çatıb.

Azalmia digər xərclərin hesabına olub – təqribən 400 min manat.

Nəticədə bank ili 5 milyon 548 min manat əməliyyat mənfəəti ilə tamamlayıb. Ötən il bu göstərici 5,28 milyon manat olmuşdu.

Bank əməliyyyat mənfəətinin 4 milyon manata yaxın hissəsini mümkün zərərlərdən ehtiyatlara ayırıb. Nəticədə vergiyə qədərki mənfəət 1 milyon 555 min manat, 321 min manat vergi ödənişindən sonra isə xalis mənfəət 1 milyon 226 min manat olub.

Bu ötən illə müqayisədə 4 dəfə azdır, hərçənd qeyd etmək lazımdır ki, ötən il belə yüksək mənfəət mümkün zərərlər üzrə ayrılmış ehtiyatların geri çəkilməsi ilə mümkün olmuşdu.

  Bu il yanvarın 1-nə “Bank Avrasiya”nın aktivləri 159,704 milyon manat olub ki, bu da 1 il əvvələ nisbətən 6,3% azdır. Bunun 97,99 milyon manatı müştərilərə verilmiş xalis kreditlərdir. 2020-ci ildə Bankın kredit portfeli 0,7% böyüyüb. Kredit portfelinin böyüməsi istehlak kreditlərinin iki dəfədən çox artaraq 3,5 milyondan 7,5 milyon manata çatması ilə bağlıdır.

Hesabat dövründə “Bank Avrasiya”nın öhdəlikləri 12,1% azalaraq 88,556 milyon manata, o cümlədən depozit portfeli 18,2% azalaraq 44,028 milyon manata düşüb, balans kapitalı isə 2,1% artaraq 71,148 milyon manata çatıb.

Xatırladaq ki, "Bank Avrasiya" 2007-ci ildə yaradılıb. Onun nizamnamə kapitalı 50 milyon manatdır. Bankın səhmlərinin 37,5%-i "Euro Standard" MMC-yə ("Xalq Bank" ASC-nin 33,85%-lik, "Xalq Sığorta" ASC-nin 50%-lik səhmdarı), 37,5%-i "PMD Qrup" MMC-yə, 25%-i isə "Azbizneskom" MMC-yə məxsusdur.