Xəbər verildiyi kimi, Azərbaycan Mərkəzi Bankı (AMB) bankların bağlanması barədə danışarkən, FED.az-ın sualına cavab olaraq bəzi bankların auditorlarının onların audit hesabatlarını təhrif etdiyini bildirib.
«Xarici auditin sifarişçisi bankdır, audit xidmətinin haqqını o ödəyir. Bu baxımdan, auditor biznes baxımdan maraqlıdır ki, sifarişi alsın. Amma digər tərəfdən, auditor dövlət, bankın əmanətçiləri, hətta səhmdarları (çünki auditi bankın menecmenti sifariş verir), xüsusilə kiçik səhmdardar qarşısında ciddi məsuliyyət daşımalıdır ki, bankın vəziyyətini düzgün, obyektiv göstərsinlər»-deyə baş bankir bildirmişdi.
Onun sözlərinə görə, AMB bu sahədə ciddi yeniliklər hazırlaşır: «Bunlardan ən mühümlərindən biri – (requlyatorun, yəni AMb-nin) xarici audit və bankın daxili nəzarət orqanları ilə işin qurulmasıdır. Bu fundamental bir işdir, ilk növbədə qaunvericilik bazaısına baxmaq lazımdır ki, qanunvericilik requlyatorun tələblərini nə dərəcədə əhatə edir».
Qeyd edək ki, bağlanan bankların hesabatını bir neçə şirkət hazırlayıb.
«AG Bank»
2015-ci il üzrə hesabatını KPMG Audit Azərbaycan MMC aparıb. Hesabatda bankın aktivlərinin 494 milyon manat, öhdəliklərinin 537,6 milyon manat, kapitalının isə mənfi 43,5 milyon manat olduğu göstərilib. Yeri gəlmişkən, elə həmin hesabatda göstərilir ki, 2014-ün yekununda bankın kapitalı müsbət 44,9 milyon manat olub.
2016 –cı il üzrə audit hesabatını KPMG Audit Azərbaycan MMC aparıb. Hesabatda bankın aktivlərinin 434,5 milyon manat, öhəliklərinin 465,2 milyon manat, bankın kapitalının isə mənfi 30,7 milyon manat olduğu göstərilib.
2017 –ci il üzrə audit hesabatını RSM Azerbaijan şirkəti hazırlayıb. Hesabatda deyilir ki, bankın 2017-ci ilin yekunu üzrə cəmi aktivləri 411,6 milyon manat, cəmi öhdəlikləri 440,4 milyon manat, cəmi kapitalı mənfi 28,8 milyon manat təşkil edir.
2018-ci il üzrə auditini də RSM Azerbaijan şirkəti aparıb. Hesabata görə, bankın cəmi aktivləri 415 milyon manat, cəmi öhdəlikləri 443,8 milyon manat, kapitalı isə mənfi 28,8 milyon manat təşkil edib.
«AG Bank»ın 2019-cu il üzrə audit hesabatı hazırlanmayıb.
“NBC Bank”
“NBC Bank”ın əvvəlki illər üzrə hesabatları bankın internet səhifəsindən yığışdırılıb. Yalnız 2018-ci il üzrə hesabatı qalıb.
Bu hesabatı da “RSM Azerbaijan” şirkəti hazırlayıb. Amma hesabatda bankın 2017-ci iin yekunları üzrə maliyyə vəziyyəti də göstərilir.
Hesabatda deyilir ki, bankın 2017-ci ilin yekunu üzrə cəmi aktivləri 197,4 milyon manat, öhdəlikləri 146,8 milyon manat, kapitalı 50,6 milyon manat olub.
“RSM Azerbaijan”ın hazırladığı 2018-ci il üzrə hesabata əsasən isə bankın cəmi aktivləri 277,2 milyon manat, cəmi öhdəlikləri 224,7 milyon manat, kapitalı isə 52,5 milyon manat olub.
“NBC Bank”ın 2019-cu il üzrə audit hesabatı hazırlanmayıb.
«Atabank»
Bank sektorunda budəfəki «təmizlik kampaniyasının» ən qalmaqallı iştirakçısı «Atabank»ın isə «Praysvoterhaus Kupers Audit Azərbaycan» MMC yoxlayıb. Amma bankın saytı artıq bloklanıb və hesabatları götürülüb.
«Amrahbank»
«Amrahbank» rəhbərliyi bankın auditini «Grant Thornton Azerbaijan» şirkətinə etibar edib. Amma bu bankın da saytı bloklanıb və hesabatı yığışdırılıb.
