Azərbaycanın aparıcı banklarından olan «Yelo Bank» 2022-ci ilin 1-ci rübünün nəticələrini açıqlayıb.
Eləcə də bax: "Yelo Bank"ın aktivləri - 145 MİLYON ARTIB
FED.az bankın hesabatına istinadən xəbər verir ki, «Yelo Bank» bu dövrü xalis mənfəətlə başa vurub. Ən əsası odur ki, bank bütün əsas göstəricilər üzrə ciddi nəticələrə nail olub.
Hələ ötən ilin əvvəlində «Yelo Bank»ın yeni komandası işə başlayanda (həmin vaxt bank böyük zərərlə üzləşmişdi) – qarşıda iki seçim vardı: ya gəlirləri artırmaq, ya da xərcləri azaltmaq: «Xərclərin azaldılması ixtisarlar və filialların azaldılması demək idi. «Yelo Bank»ın səhmdarı və Müşahidə Şurası ixtisarların əleyhinə idi. Ona görə də biz biznesi gücləndirməyə – kredit və depozit portfelinin artırılmasına ciddi diqqət yetirdik» - deyə bankın sədri Anar Həsənov FED.az-a bildirib.
Ötən il atılan addımların nəticəsi özünü bir neçə aydan sonra göstərməyə başladı - bank 2021-ci ili böyük mənfəətlə tamamladı.
Artım 2022-ci ildə də davam edir – bu ilin ilk rübündə bankın aktivləri kəskin şəkildə - 140 milyon manat və ya 27 faiz böyüyərək 534 milyondan 678 milyon manata yüksəlib. «Yelo bank» bu göstərici üzrə ölkə bankları arasında 1-cidir.
Bankın fəaliyyətinin əsas istiqamətləri üzrə - kredit və depozit portfeli də böyüyüb – 1-ci rübdə kredit portfeli (xalis kreditlər) 26 milyon manat və ya 6,4% artaraq 431 milyon manata yüksəlib, artımın böyük hissəsi – 23 milyon manatı biznes kreditlərinin payına düşüb. Hesabat dövrü ərzində Bank təkcə real sektorun maliyyələşməsinə 77 milyon manat kredit ayrılıb. 4 minə yaxın müştəriyə isə 27 milyondan çox istehlak krediti verilib.
Bankın aktiv fəaliyyəti və kredit portfelinin böyüməsi özünü dərhal bankın gəlirlərində, xüsusilə də faiz gəlirlərinin artımında göstərib –faiz gəlirləri 34% artaraq 19 milyon manata yaxınlaşıb. Bu göstərici ilə «Yelo Bank» 2022-ci ilin 1-ci rübündə faiz gəlirlərini ən sürətlə artıran banklardandır.
Kreditlərin böyüməsi paralel olaraq portfelin «təmizlənməsi» ilə müşayiət olunur. Əvvəla, bankda iri kreditlərin araşdırılması prosesi ciddi nəzarətə götürülüb: «1 milyon manatdan artıq olan kreditlərin ayrılması zamanı Xüsusi Kredit Komitəsi və Müşahidə Şurası ilə razılaşdırılır»-deyə bankın sədri anar Həsənov FED.az-a bildirib. Belə yanaşma və problemli müştərilərlə aparılan iş nəticəsini verib. Təkcə ötən il problemli kreditlərin həcmi 70 milyon manat azalıb, bu ilin ilk 3 ayında isə bankın cari (yəni 1 gün də gecikməsi olmayan) kredit portfeli 84%-dən 86%-ə yüksəlib.
«Problemli kreditlərlə bağlı işimiz müvəqqətidir. Düşünürəm ki, yaxın 1-2 ildə bu proses bitəcək. Əvvəla bura heç nə əlavə olunmur, nə varsa (problemli kredit) keçmişdən qalandardır. Son dövrlər ayrılan kreditlərin problemli hissəsi 1%-dən də aşağıdır».
Kredit portfelinin «təmizlənməsi» öz növbəsində indiyədək bankın mümkün zərərlər üçün ayırdığı ehtiyatları geri qaytarmağa da (811 min manat) imkan verib.
Bankın aktivliyinin digər göstəricisi – qeyri-faiz gəlirlərinin kəskin artmasıdır. Bu ilin 1-ci rübündə «Yelo bank» 1,3 milyon manatdan qeyri-faiz gəliri ildə edib, bu ötən ilin eyni dövrü ilə (653 min manat) müqayisədə 2 dəfə artıqdır.
1-ci rübün sonunda «Yelo bank»ın ümumi depozit portfeli 100 milyon manatdan çox artaraq 452 milyon manata yüksəlib. Depozit portfelinin böyüməsi isə banka inamın göstəricisidir – təkcə son 3 ayda , 1200-dən çox müştəri öz əmanətlərini «Yelo Bank»a etibar edib
Yeri gəlmişkən, bu proses ötən ildən başlanıb: «Kredit portfelimiz hər ay təqribən 15 milyon, depozit portfelimiz 6-7 milyon manat artırdı»-deyə Anar Həsənov bildirir.
Depozit portfelinin artımı bankın faiz xərclərini artırıb – «Yelo Bank» təkcə bu ilin 3 ayında bankda əmanəti olan müştərilərə 5,8 milyon manat ödəniş edib, ötən illə müqayisədə təqribən 2 dəfə artıq.
Hazırda «Yelo Bank» təsir dairəsini həm ənənəvi, həm də innovasiyalarla genişləndirir. Yəni bank filial şəbəkəsini artırır, həm də getdikcə daha çox məhsul satışı rəqəmsal formata keçir. Məsələn, bu ilin 1-ci rübündə ayrılan 27 milyon manat istehlak kreditinin təqribən 30%-i onlayn kanallar vasitəsilə həyata keçirilib.
«Ümumiyyətlə bizim biznesin böyüməsi istiqamətlərindən biri də kredit portfeli ilə yanaşı, rəqəmsallaşdırmadır ki, əməliyyatların effektivliyini artıraq»-deyə bankda bildirirlər.
Eyni zamanda bank 2022-ci ilin ilk rübü ərzində Salyanda və Ağcabədidə olmaqla 2 yeni regional filialını istifadəyə verib.
1-ci rübün maliyyə nəticələrini şərh edən «Yelo Bank»ın sədri Anar Həsənov hər iki istiqamətin davam edəcəyini bildirib: «Bu il müştərilərimizin həyatını rahatlaşdıracaq daha bir neçə yeni rəqəmsal məhsullarımızı istifadəyə verməyi və xüsusilə regional istiqamətdə xidmət şəbəkəmizi genişləndirməyi nəzərdə tutmuşuq».
Hazırda «Yelo Bank» əsasən kiçik və orta biznesin maliyyələşdirilməsinə fokuslanıb və həmin sektora uyğun kreditlərə üstüynlük verir: «Bizim strategiyamıza əsasən, biz özümüzü orta və kiçik sahibğkarlıqda görürük. Xüsusilə də aqrar sahədə böyük potensial var. Aqrar sahəni əhatə etmək üçün regionlara daha çox yönələcəyik»-deyə bank rəhbəri bildirib.
Yeri gəlmişkən, son dövrdə idarəetmədə baş verən dəyişikliklər və vergi-gömrük islahatları da bankların fəaliyyət mühitini yaxşılaşdırıb. Dövriyyələrin rəsmiləşməsi və şəffaflaşması ümumilikdə bank sektorunun dövriyyəsinə, bank xidmətlərinə tələbatın və gəlirlərin artmasına səbəb olub. «Ola bilər maaşların rəsmiləşdirilməsi özünü kreditərlərlə o qədər də göstərməsin, amma korporativ miqyasda, şirkətlərin dövriyyələrinin şəffaflaşması biznes kreditlərinə ciddi təsir göstərir».
Bank menecmentinin planlarına görə, bu il əsas hədəf əməliyyat gəlirliyinə çıxmaqdır: «Bu il hədəfimiz ehtiyatlardan asılı olmayaraq əməliyyat gəlirliyinə çıxmaqdır. Buna nail olanda artıq deyə bilərik ki, bank keçmişdə olan problemlərin hamısını geridə buraxdı və tam olaraq yeni dövrə başlayır»-deyə A.Həsənov bildirib.
Xatırladaq ki, 1-ci rübün sonuna Bank-ın məcmu kapitalı 89 milyon manat təşkil edib ki, bu da AMB-nin tələbindən 39 milyon manat çoxdur. Məcmu kapitalın adekvatlıq əmsalı 14.61%, birinci dərəcəli kapitalın adekvatlıq əmsalı isə 9.33% olmaqla, hər iki göstərici üzrə tələb olunan normanı üstələyir.
