«Toyota» şirkəti özünün «Toyota bz3X» elektrik krossoverinə indiyədək görünməmiş qeyri-adi zəmanət elan edib.
FED.az xəbər verir ki, şirkətin məlumatına görə, «Toyota bz3X» yanarsa, şirkət dərhal maışının sahibinə yeni avtomobil verəcək.
Bundan başqa, şirkət elan edib ki, «Toyota bz3X»nin parkinqi zamanı ortaya çıxa bilən bütün zədələr şirkət tərəfindən qarşılanacaq.
Bununla bağlı zəmanətlər bir neçə gün əvvəl «Toyota»nın elektrik krossoverlərinin istifadəçiləri üçün keçirilən konfransda açıqlanıb. Tədbirdə «Toyota bz3X»nın istehsalçısı olan «GAC Toyota» birgə müəssisəsi elan edib ki, şirkət bu modelin sahiblərinə ömürlük zəmanət verir.
Zəmanət maşının akkumulyatorunda və ya elektromotorunda öz-özünə alışma və avtomatik parkinq zamanı yarana bilən zədələrə aiddir. Şirkət bu hallar baş verərsə dəymiş zərəri qarşılayacaq və ya avtomobil yenisi ilə əvəz ediləcək.
Belə ki, maşının 3 hissəsinin – batareya, elektromotor və elektron idarə etmənin – düzgün işləməməsi səbəbindən yanğın olarsa maşının sahibinə yeni avtomobil veriləcək. Bu zaman sığorta şirkətinə müraciət etməyə də ehtiyac qalmayacaq, şirkət avtomobili birbaşa özü yenisi ilə əvəz edəcək.
Maşının avtomatik parkinqi (yəni avtomobilin öz-özünü parkinq etməsi) zamanı hadisə baş verdikdə isə şirkət həm maşına, həm də digər şəxslərə dəyən zərəri özü ödəyəcək.
Maraqlıdır ki, bu qarantiyalar «Toyota bz3X» avtomobilinin həm yeni, həm də indiyədək olan sahiblərinə aiddir və maşının bütün istismarı dövründə qüvvədə olacaq.
