Azərbaycan Meliorasiya və Su Təsərrüfatı ASC bölgələrdə su təminatı ilə bağlı rayonlarda görüş keçirib.
Azərbaycan Meliorasiya və Su Təsərrüfatı Açıq Səhmdar Cəmiyyətinin nümayəndəsi Dilqəm Şərifov FED.az-a bildirib ki, son vaxtlar respublikanın çaylarında su sərfinin azalması səbəbindən əkin sahələrinin su təminatında çətinliklər yaranır. Bu çətinliklərin aradan qaldırılması üçün Səhmdar Cəmiyyət tərəfindən tədbirlərə başlanılıb.
Belə ki, Azərbaycan Meliorasiya və Su Təsərrüfatı ASC-nin sədr müavini Zakir Quliyevin rəhbərliyi ilə Cəmiyyətin nümayəndələri martın 29-da İmişli rayonu ərazisində Araz çayı üzərində yerləşən Bəhrəmtəpə hidroqovşağında görüş keçib. Görüşdə əkin sahələri əsasən Araz çayından su ilə təmin edilən İmişli, Saatlı, Biləsuvar və Cəlilabad rayonlarının icra hakimiyyəti başçılarının və aidiyyəti təşkilatların mütəxəssislər iştirak edib.
Toplantıda qeyd edilib ki, hazırda Bəhrəmtəpə hidroqovşağında saniyədə 53 kubmetr su olur. Bundan 22 kubmetr Yuxarı Qarabağ kanalı vasitəsi ilə Araz çayını qidalandırır.
Eyni zamanda bildirilib ki, su itkilərinin qarşısını almaq üçün respublikanın bir sıra bölgələrində torpaq kanallar betonlə üzlənir. O cümlədən İmişli rayonu ərazisində yerləşən Boztəpə və Qızılarx kanalları da beton üzlüyə alınmaqla yenidən qurulur.
Əkinlərin optimal müddətlərdə suvarma suyu ilə təmin edilməsi və su təminatının yaxşılaşdırılması məqsədi ilə yerli istismar idarələrinə səyyar tipli nasos stansiyaları verilib.
Görüş zamanı qərar qəbul edilib ki, su ehtiyatları göstərilən rayonlar (İmişli, Saatlı, Biləsuvar və Cəlilabad) arasında, hazırda suvarılması tələb olunan mövcud əkin sahələrinə uyğun olaraq bölüşdürülsün.
Bundan başqa, toplantıda son vaxtlar su təminatında ciddi çətinliklər yaranan Saatlı rayonunda Sabir kanalı suvarma sisteminin xidməti ərazisində yerləşən 14 kənd üzrə su bölgüsü qrafiki müəyyən edilib.
Görüşdə su təminatı ilə məşqul olan qurumlara tapşırıq verilib ki, su ehtiyatları, su təminatı imkanları və gözlənilən risklər barədə su istifadəçilərinə əvvəlcədən məlumat verilsin. Bundan başqa, yerli qurumlara sudan səmərəli- qənaətlə istifadə, su itkilərinin azaldılması, sudan istifadəyə nəzarəti gücləndirmək tapşırılıb.
Eyni zamanda, su istifadəçilərinə - fermerlərə isə tövsiyə edilib ki, əkin sahələrini suvarmaya düzgün hazırlasınlar sudan qənaətlə istifadə etsinlər, aqrotexniki qaydalara və suvarma qrafiklərinə ciddi riayət etsinlər, və gecə suvarmaları təşkil edilsin.
