Azərbaycanda dövlət dəstəyi ilə təqdim olunan aqrar sığorta mexanizmindən istifadə edərək faydalanan fermerlərin sayı artmaqdadır.
Kənd təsərrüfatı heyvanlarının sığortası üzrə - SIĞORTA HAQQI AZALDILDI – FONDDAN AÇIQLAMA
FED.az xəbər verir ki, 2024-cü yanvar-noyabr aylarının nəticələrinə əsasən sığortalanan meyvə bağları/əkin sahələri və heyvnadarlıq təsərrüfatları üzrə fermerlərə zərər ödənişlərində yüksək artım baş verib.
Aqrar Sığorta Fondunun məlumatına görə, 2024-cü ilin yanvar-noyabr aylarında müxtəlif hadisələr nəticəsində zərərlə üzləşmiş sığortalı fermerlərə 5 milyon 642 min manat sığorta ödənişi edilib.
Sığorta ödənişlərinin 4 milyon 659 min manatı meyvə bağları/əkin sahələri, 983 min manatı isə heyvandarlıq sığortası üzrə edilib.
2023-cü ilin eyni dövrünə nisbətən sığorta ödənişlərinin məbləği 2 dəfə, o cümlədən meyvə bağları/əkin sahələri üzrə ödənişlər 2,3 dəfə, heyvnadarlıq təsərrüfatları üzrə ödənişlər isə 40% artıb.
Xatırladaq ki, 2023-cü ilin eyni dövründə Aqrar Sığorta Fondu tərəfindən sığortalı fermerlərə ümumilikdə 2 milyon 741 min manat sığorta ödənişi edilmişdi. Bundan 2 milyon 043 min manat meyvə bağları/əkin sahələri, 698 min manat isə heyvandarlıq sığortası üzrə edilmişdi.
2024-cü ilin ilk 11 ayında bitkiçilik sığortası üzrə ən çox sığorta ödənişləri fırtına, dolu, şaxtavurma və subasma hadisələri üzrə həyata keçirilib. Heyvandarlıq sığortasında isə ödənişlərin böyük hissəsi yoluxucu xəstəliklər və ot-yemdən zəhərlənmə hallarına aid olub.
2024-cü ilin yanvar-noyabr aylarında Aqrar Sığorta Fondu tərəfindən ümumilikdə 410 min 561 hektar əkin sahəsi sığortalanıb. Əkin sahələrinə 462 milyon manat məbləğində sığorta təminatı verilib.
Bu dövrdə ölkə üzrə 3 169 baş kənd təsərrüfatı heyvanı sığorta edilib, 19 milyon 554 min manat sığorta təminatı verilib.
Hesabat dövrü ərzində 12 milyon 829 min manat sığorta haqqı toplanıb. Bitkiçilik üzrə ödənilən sığorta haqları 10 milyon 934 min manat, heyvandarlıq sahəsi üzrə isə 1 milyon 895 min manat təşkil edib.
Ən çox sığortalanan əkin sahələri taxıl və pambıq bitkiləri ilə yanaşı, nar, şaftalı, nektarin, fındıq, üzüm və zeytun bağları, çəltik, şəkər çuğunduru sahələri olub.
Xatırladaq ki, Azərbaycanda aqrar sığorta dövlət dəstəyi ilə təqdim edilir – sığorta haqqının 50%-ni fermerlərə dəstək üçün dövlət özü ödəyir. Nəticədə fermerlər cüzi ödəniş etməklə təsərrüfatlarını çoxsaylı risklərdən sığorta edə bilirlər.
Aqrar Sığorta Fondunun fəaliyyəti və aqrar sığorta şərtləri barədə daha ətraflı məlumatı Fondun rəsmi internet səhifəsindən (www.asf.gov.az) əldə etmək olar.
