Bu gün Azərbaycan üçün mühüm hədəflərdən biri də kənd təsərrüfatını sürətlə inkişaf etdirərək yerli istehsal hesabına daxili bazarı lazımınca ərzaq məhsulları ilə təmin etməkdir. Onu da etiraf edək ki, bu sahədə müəyyən uğurlar da var.
Cəlilabadda fermerlər kartof ixracında - PROBLEMLƏ ÜZLƏŞİBLƏR
İndi ölkədə elə bölgə tapmaq olmaz ki, orada kənd təsərrüfatının şaxələndirilməsi istiqamətində iş aparılmasın. Ən çox da diqqət ənənəvi kənd təsərrüfatı məhsullarının istehsalının artırılmasına verilir. Belə məhsullardan biri də kartofdur.
FED.az xəbər verir ki, son illər Tovuz rayonunda bu sahəyə diqqət xeyli artmışdır. Rayon fermerləri iqtisadi cəhətdən gəlirli olan bu məhsulun istehsalını artırmaq üçün həm əkin sahələrini genişləndirir, həm də məhsuldar sortlara üstünlük verirlər.
Bu günlər belə təsərrüfatlardan birində olduq. Təsərrüfatın aparıcı mütəxəssisi Zaur Bağırovla görüşdük. O, əkin sahəsində yetişdirilən kartofun dərmanlanmasına nəzarət edirdi. Söhbət zamanı məlum oldu ki, təsərrüfat əsasən taxılçılıq və kartofçuluqla məşğul olur. Keçən il təsərrüfat 330 hektardan 2310 ton taxıl biçmişdir. İstehsal olunan məhsulun 1000 tonu toxum kimi ayrı-ayrı təsərrüfatlara satılmışdır.
Öyrəndik ki, təsərrüfat kartof istehsalında da yüksək göstəricilərə nail olur. Belə ki, ötən il icarəyə götürülmüş 60 hektardan 3 min 300 ton kartof götürülmüşdür ki, bu da 55 sentner məhsuldarlıq deməkdir. Təsərrüfat bu il kartof əkini sahəsini 80 hektara çatdırmışdır. Sahələrdə yaxşı çıxış alınmışdır. Əkilmiş kartofun suvarılmasında əsasən Ağstafaçay su anbarından istifadə edilir. Hazırda becərmə işlərində 4 nəfər çalışır. Məhsul yığımında onların sayı 40 nəfərdən çox olacaq.
Söhbət zamanı onu da öyrəndik ki, təsərrüfat əsasən Holland sortu olan "Marabel" və "Allergiya" sortlarından istifadə edir. Bundan başqa, qardaş Türkiyədən gətirilmiş "Qafqaz" və "Bahar" sortlarının da sınağı keçirilir. Yeni sortlar rayonun iqlim şəraitinə uyğunlaşsa və məhsuldar olsa, gələcək illərdə onlardan istifadə ediləcək.
Hazırda təsərrüfatın əkin sahələrində becərmə işləri gedir. Kartofun dibi boşaldılır, ziyanvericilərə və xəstəliklərə qarşı mübarizə tədbirləri görülür. Kollektiv əmindir ki, keçən il olduğu kimi, bu il də sahələrdən bol məhsul götürəcək. (Azərbaycan)
