06 oktyabr 2018 13:17

"Hər il 10-12 min manat gəlir götürürəm"

Ata-babadan fındıqçılıqla məşğul oluruq. Fındıqçılıq mənim kimi, qəsəbəmizdə yaşayan yüzlərlə ailənin əsas gəlir mənbələrindən biridir. Hazırda ailəmizin ata-babadan qalma 5 hektar fındıq bağı var. Keçən il bağımızdan 3,5 ton məhsul götürdük. Xərcləri çıxandan sonra 10 min manatadək gəlirimiz oldu. Bu il isə fındıq bağımızdan 4,2 ton məhsul əldə etmişik.

FED.az xəbər verir ki, bunu  Zaqatala rayonunun Əliabad qəsəbəsinin sakini Ədalət Sulxayev deyib.

Bu il də fındıqçılıqdan gəlirinin ən az ötənilki qədər olacağını vurğulayan fermerin sözlərinə görə, artıq bazarda fındığın bir kiloqramının qiyməti 3 manata yaxınlaşır. Bu qiymət istehsalçıları qane edir.

Qəsəbə sakininin sözlərinə görə, fındıqçılığın çox gəlirli sahə olduğunu nəzərə alaraq, ötən il 3 hektar sahədə yeni fındıq bağı salıb, əraziyə 450 fındıq tingi əkib. Yaxşı qulluq olunduğu təqdirdə yeni salınan bağ 5-6 ildən sonra artıq məhsul verəcək.

Sulxayevlər ailəsi, eyni zamanda, tütünçülük, taxılçılıq və heyvandarlıqla da məşğul olur. Təsərrüfat rəhbərinin bildirdiyinə görə, üç ildir ki tütün yetişdirir. Bu il 10 hektar sahədə tütün əkib. İndiyədək emal məntəqəsinə 40 ton yaşıl tütün kütləsi təhvil verib. Tütün yığımı hələlik davam edir. Bundan əlavə, fermer ailəsi payız mövsümündə gələn ilin məhsulu üçün 10 hektar sahəyə taxıl əkməyi də planlaşdırır.

Ümumiyyətlə, fındıqçılıq Zaqatala rayonunun kənd əhalisinin, o cümlədən Əliabad qəsəbəsi sakinlərinin əsas məşğuliyyət sahələrindən biridir. Qəsəbənin ərazi icra nümayəndəsi Həsən Həsənov bildirib ki, 11 mindən çox əhalinin yaşadığı bu qəsəbədə olan 3182 ailə-kəndli təsərrüfatının böyük əksəriyyəti fındıqçılıqla məşğuldur.

Hazırda qəsəbənin ərazisində 2276 hektar fındıq bağı var. Son bir ildə daha 750 hektar sahədə yeni bağlar salınıb. 2017-ci ildə fındıq bağlarından 1268 ton məhsul tədarük olunub. Qəsəbə sakinləri ötən il təkcə fındıqçılıqdan 3,8 milyon manatadək gəlir əldə ediblər. Builki mövsümdə isə fındıq bağlarından 1430 ton məhsul yığılıb. Deməli, bu il də Əliabad sakinlərinin fındıqçılıqdan gəlirləri yaxşı olacaq.

Paylaş
Mənbə

Şərhlər

Şərh yoxdur

Cavab yaz